އިސްމާއިލް
އެމްޑީޕީގެ މެމްބަރުންނަކީ އެމީހުންނަށް ލިބިފައި ހައްގު އެއްވެސް ހާލަތެއްގައި ވިއްކާލާނެ ބައެއް ނޫކަން ގައުމީ ޗެއަރޕާސަނަކު ހޮވުމަށް ބޭއްވި އިންތިހާބުން ސާބިތުކަމާއެކު ދައްކައިދީފިކަމަށާއި، އަދި ޑިމޮކްރަސީގެ އާމަރުހަލާއަކަށް އެއިންތިހާބަށް ފަހު ދެވިއްޖެކަމަށް އެމްޑީޕީގެ ގައުމީ ޗެއަރޕާސަނަކު ހޮވުމަށް ބޭއްވި އިންތިހާބު ކާމިޔާބުކުރެއްވި ރައްޔިތުންގެ މަޖިލީހުގެ ކ އަތޮޅު މެމްބަރު މާރިޔާ އަހުމަދު ދީދީ ވިދާޅުވެއްޖެއެވެ.
"އަޅުގަނޑު ވޯޓެއް ގަންނަން ބައިރުފިޔާއެއްވެސް ހަރަދެއް ނުކުރަން. އެމްޑީޕީގެ މެމްބަރުންނަކީ އެބޭފުޅުންނަށް އެލިބިފައިވާ ހައްގު އެއްވެސް ހާލަތެއްގެ ވިއްކާލައްވާ ބޭފޫލުންނެއް ނޫންކަން ސާބިތުކަމާއެކީ މިރޭ ދައްކައިދީފި. މިއިންތިހާބުގަ އެއްވެސް މައްސަލައެއް އަޅުގަނޑަކަށް ނުފެނެއޭ" އެމްޑީޕީގެ ރިޔާސީ ޕްރައިމަރީސް އާއި ގައުމީ ޗެއަރޕާސަނަކު ހޮވުމަށް ބޭއްވި އިންތިހާބަށް ފަހު ހުކުރުދުވަހުގެރޭ ކަލާފާނު ސުކޫލުގައި މި ދެއިންތިހާބުގައި ވާދަކުރެއްވި ކެނޑިޑޭޓުން ބެއްވި ހާއްސަ ބައްދަލުކޮށްލުމުގައި ވާހަކަ ދައްކަވަމުން މާރިޔާ ވިދާޅުވިއެވެ.
އެމްޑީޕީން އިއްޔެ ބޭއްވި އެޕާޓީގެ ގައުމީ ޗެއާޕާސަނަކު ހޮވުމުގެ އިންތިހާބު މާރިޔާ ކާމިޔާބު ކުރެއްވީ 83 އިންސައްތަ ވޯޓް ހޯއްދަވައިގެންނެވެ. ވޯޓްލީ 11200 މީހުންގެ ތެރެއިން 9263 ގެ ވޯޓް މާރިޔާ ހޯއްދެވިއެވެ. މާރިޔާއާ ވާދަކުރެއްވި މުހައްމަދު ނާޒިމް (ބައުންޓީ)އަށް ލިބިވަޑައިގަތީ 1518 ވޯޓެވެ. އެއީ 14% އެވެ.
ރޭގެ މިބައްދަލުކޮށްލުމުގައި ވާހަކަ ދައްކަވަމުން މާރިޔާ ވިދާޅުވީ ރިޔާސީ ޕްރައިމަރީސްގައި ވާދަކުރެއްވި ތިން ކެނޑިޑޭޓުންވެސް ޑިމޮކްރަސީގެ ވަރަށް ރީތި މިސާލެއް ދައްކުވައިފިކަމަށާއި، އެބޭފުޅުން ގައުމީ ބަހުސެއް ކުރެއްވުމަށް ފަހު އެކުވެރިކަމާއެކު ވަޑައިގެންނެވި ރީތި ގޮތަކީ އެއްޑީޕީގެ މެމްބަރުންގެ އިތުރުން އެމްޑީޕީއަށް ނިސްބަތް ނުވާ މެމްބަރުންވެސް ނަމޫނާއެއްގެ ގޮތުގައި ބަލައިގެން ކަމެއް ކަމަށެވެ.
އިންތިހާބު ކުރިއަށް ދިޔަ ގޮތާމެދު ވާހަކަދައްކަވަމުން ގައުމީ ޗެއަރޕާސަނަކަށް ވާދަ ކުރެއްވި މުހައްމަދު ނާޒިމް (ބައުންޓީ) ވިދާޅުވީ އެއްވެސް ކަހަލަ ހިތްހަމަ ނުޖެހޭ ކަމެއް އެއިންތިހާބުން ފެންނަންނެތްކަމަށާއި، އިންތިހާބާ މެދު ޖެއްސޭނެ އެއްވެސް މައްސަލައެއް ނެތްކަމަށެވެ. އަދި އިއްޔެ ނިމިގެންދިޔަ ދެއިންތިހާބުގެ ތެރެއިން އެންމެ އިންސާފުވެރިކޮށް ދިޔައީ ޗެއަރޕާސަންއަކު ހޮވުމަށް ބޭއްވި އިންތިހާބުކަމަށް ނާޒިމް ވިދާޅުވިއެވެ.
"އަޅުގަނޑު ހިތްހަމަ ނުޖެހޭ އެއްވެސް ކަމެއް މިތަނަކުން ފެންނާކަށް ނެތޭ. އަޅުގަނޑުގެ އެއްވެސް މައްސަލައެއް އިންތިހާބާއި މެދަކު ނެތް" ނާޒިމް ވިދާޅުވިއެވެ.
ގައުމީޗެއަޕާސަންގެ އިންތިޚާބުގައި ވާދަކުރެއްވި ދެބޭފުޅުންވެސް ބޮޑު ކެމްޕޭންނެއް ނުކުރައްވައެވެ. އަދި އެކަމުގެ ސަބަބު ހާމަކުރައްވަމުން މިދިޔަ ބުރާސްފަތި ދުވަހު މާރިޔާ ބޭއްވި ނޫސްކޮންފަރެންސެއްގައި ވިދާޅުވީ ސިޔާސީ ޕާޓީއެއްގެ އެންމެ ބޮޑު މަގުސަދަކީ އެޕާޓީ ވެރިކަމަށް އައުންކަމަށާއި، އެހެން ވުމުން ރިޔާސީ ޕްރައިމަރީ އޮންނަ ވަގުތެއްގައި އެއިންތިހާބަށް ހިޔަނި އެޅޭގޮތަށް އެއްވެސް ކަމެއްކުރަން ބޭނުންނުވާތީ މަޑުކޮށްލައިގެން ހުންނެވީ ކަމަށެވެ. އެހެން ނަމަވެސް ފޯނުންނާއި އެފަދަ ވަސީލަތްތަކުން ކެމްޕޭން ކުރިއަށް ގެންދެވި ކަމަށް މާރިޔާ ވިދާޅުވިއެވެ.
އިންތިހާބަށް ކުރިމަތި ލެއްވުމަށް ފަހު ނޫސްވެރިންނާއެކު މާރިޔާ ބެއްވި ހަމައެކަނި ބައްދަލުވުމުގައި ޕާޓީގެ ޗެއަރޕާސަންގެ މަގާމަށް ހޮވިވަޑައިގެންފިނަމަށް ކުރައްވާނެ އެންމެ މުހިންމު ކަމެއްކަމަށް މާރިޔާ ވިދާޅުވީ ޕާޓީގެ އެއްބައިވަންތަކަން ދެމެހެއްޓުމަށް މަސައްކަތްތަކެއް ކުރެއްވުން ކަމަށެވެ. އަދި ރާއްޖޭގެ ވެރިކަން ކުރާ ނިޒާމަކީ ރިޔާސީ ނިޒާމެއް ކަމަށް ހަމަޖެހުމުން އެކަމާ ގުޅިގެން ޕާޓީގެ އޮނިގަޑަށްވެސް ބަދަލުތަކެއް ގެންނަވާނެކަމަށާއި، ކުރިއަށް އޮތް ރިޔާސީ އިންތިހާބު ކާމިޔާބު ކުރުމަށް ގިނަ މަސައްކަތް ތަކެއް ކުރައްވާނެ ކަމަށް މާރިޔާ ވިދާޅުވިއެވެ.
No comments:
Post a Comment