ހިމަންދޫ ޝަރީޢަތް: ޢަލީ ޒާހިރުގެ އަޑުއެހުންތައް ނިންމާލައިފި

އިބްރާހީމް މުޙައްމަދު

ހުސްވި އަހަރު ސެޕްޓެމްބަރ 7 ވަނަ ދުވަހު ހިމަންދޫ ހަމަނުޖެހުމުގައި ބައިވެރިވުމުގެ ތުހުމަތުގައި ދައުލަތުން ޓެރަރިޒަމްގެ ދައުވާ އުފުލާފައިވާ ޅ.ކުރެންދޫ ވިނަރެސް ޢަލީ ޒާހިރުގެ މައްސަލަގައި ހުލާސާ ބަޔާންތައް އިއްވަވައި އަޑުއެހުންތައް މިއަދު ނިންމާލައިފިއެވެ.

ޤާޟީ އަލީ ރަޝީދު ވިދާޅުވީ އެންމެ އަވަސް ފުރުސަތެއްގައި އޭނާއަށް ޙުކުމް ކުރާނެކަމަށެވެ. ހުލާސާ ބަޔާން އިއްވަމުން ދައުލަތުގެ ވަކީލު ހަސަން ޝިޔާމް ވިދާޅުވީ މިމައްސަލަގައި ޢަލީ ޒާހިރުގެ މައްޗަށް ހެކިދިން ދެމީހުން ކަމަށްވާ މޯލްޑިވްސް ޕޮލިސް ސަރވިސްގެ ޗީފް އިންސްޕެކްޓަރ ޢަލީ ރަޝީދާއި އިންސްޕެކްޓަރ ފަރުހާދު ފިކުރީގެ ހެކިބަހުން މިމައްސަލަ ސާބިތުވާކަމަށެވެ. އަދި ހެކިބަހަށް ބަލާއިރު ޢަލީ ޒާހިރު ހަމަލާދިނީ ސިފައިންގެ ރަޔޮޓް ސްކޮޑަށް ކަމަށް ހެކިބަހުން ސާބިތުވާކަމަށް ޝިޔާމް ވިދާޅުވިއެވެ.

ޢަލީ ޒާހިރުގެ ވަކީލު އަޙްމަދު ޝާހީމް ހުލާސާ ބަޔާން އިއްވަމުން ވިދާޅުވީ ޢަލީ ޒާހިރު ދައުވާގެ އަސްލަށް އިންކާރުކުރާކަމަށާއި އޭނާ ހައްޔަރުކުރެވުނީ ދާރުލްޚައިރުގޭ ސަރަހައްދުގައި އެއްވި އެއްވުމަކުން ނޫންކަމަށެވެ. ނަމަވެސް ހައްޔަރުކުރެވުނީ ގެއިން ކަމަށް ޝަހީމް ވިދާޅުވިއެވެ.

ހެކިވެރިންގެ ހެކިބަހަށް އިޝާރާތްކޮށް ޝަހީމް ވިދާޅުވީ ހެކިބަސްދިން ދެފުލުހުންވެސް ހެކިދީފައިވަނީ ވީޑިޔޯ އަދި ފޮޓޯ ބަލައިގެން ކަމަށެވެ. އަދި ޢަލީ ޒާހިރު ހަތިޔާރު ހިފައިގެން ހުރިތަން މި މީހުންނަށް ފެނިފައިނުވާކަން މި ދެފުލުހުންގެ ހެކިބަހުން އެނގޭކަމަށް ޝަހީމް ވިދާޅުވިއެވެ. އއ.ހިމަންދޫ ރައްޔިތުންގެ ހިތުގައި ބިރުވެރިކަން އުފެދުނީ ވަކިޖަމާއަތެއްގައި ނަމާދުކުރަމުންދިޔަ މީހުންގެ ސަބަބުން ނޫންކަންފާހަގަކުރައްވައި ދައުލަތުގެ ދައުވާއިންވެސް ސާބިތުވާގޮތުގައި ސިފައިންނާއި ފުލުހުން ހިމަންދޫއަށް ގޮސްފައިވަނީ 29ސެޕްޓެމްބަރ 2007 ގައި ބޮންގޮއްވި މީހުނާއި ތަފާތު ޖިނާއީ ކުށްތަކުގެ މީހުން ހޯދުމުގެ މަޤްސަދުގައި ކަމަށް ދައުވާއިންވެސް ސާބިތުވާކަމަށް ޝަހީމް ވިދާޅުވިއެވެ.

"އެއްވެސް ހާލެއްގައި ރަށުގައި ބިރުވެރިކަމެއް އުފެދިގެނެއްނޫން" ޝަހީމް ވިދާޅުވިއެވެ.

ޝަހީމް ވަނީ ހުސްވި އަހަރު އޮކްޓޫބަރ 7 ވަނަ ދުވަހު ރަހީނުކުރި ޕްރައިވެޓް އިބްރާހީމް ރަޝީދު ކޯޓަށް ހާޟިރުކޮށްދިނުމަށް އެދިފައެވެ. އަދި ރަހީނުވި މީހަކީ ޕްރައިވެޓް ރަޝީދުކަމަށާއި ހަދިސާ ހިނގާދިޔަގޮތް އެންމެ ރަނގަޅަށް އެނގޭނީ އޭނާއަށްކަމަށް ޝަހީމް ވިދާޅުވިއެވެ. މިގޮތުން ޕްރައިވެޓް ރަޝީދު ނޫސް ތަކަށް ދިން ބަސްދީގަތުމުގައި ރަހީނުކުރުމަށްފަހު އަނިޔާ ނުކުރާކަމަށް ބުނެފައިވާކަމަށް ޝަހީމް ވިދާޅުވިއެވެ.

ޤާޟީ ވިދާޅުވިގޮތުގައި ޢަލީ ޒާހިރު ތަހުޤީޤަށް އެއްވެސް ބަޔާނެއް މޯލްޑިވްސް ޕޮލިސް ސަރވިސްއަށް ދީފައެއް ނުވެއެވެ. އަދި މިކަމުންވެސް އޭނާ ދައުވާއަށް އިންކާރުކުރާކަން ދޭހަކޮސްދޭކަމަށް ޤާޟީ ވިދާޅުވިއެވެ.

ނަމާދަށް 15 މިނެޓުގެ ހުސްވަގުތު ދިނުމަށާއި އާންމު ވަޒީފާތަކުގެ މަސައްކަތުގަޑި ހަފްތާއަކު 48 ގަޑިއިރަށް ހަމަޖައްސައި ވަޒީފާގެ ބިލު ފާސްކޮށްފި

ރއްޔިތުންގެ މަޖިލިސް

ހުސައިން ޒަބީރު (ހޒމވ)

ރައްޔިތުންގެ މަޖިލީހުގެ ތަޅުމުގައި ވަޒީފާގެ ބިލަށް މެންބަރުން ހުށަހެޅުއްވި 54 އިސްލާހުގެ ތެރެއިން 11 އިސްލާހެއް ފާސްކުރެއްވުމަށް ފަހު ވަޒީފާގެ ބިލު ބުދަދުވަހު ފާސްކޮށްފިއެވެ. ރިޔާސަތުން މި ބިލަށް ވޯޓަށް އެއްސެވުމުން ހާޒިރުވެވަޑައިގެން ތިއްބެވި 37 މެންބަރުން ފެނިވަޑައިގަންނަވާކަމަށް ވޯޓު ދެއްވުމުން ޖަލްސާގެ އިއްތިފާޤުން އަދި މަޖިލީހުގެ އަޣްލަބިއްޔަތުން ފާސްވިއެވެ.

 

ވަޒީފާގެ ބިލަށް ނަޒަރެއް

ވަޒީފާއާބެހޭ ބިލު އެންމެ ފުރަތަމަ މަޖިލީހަށް ހުށަހެޅުނީ 13 ޖުލައި 2006 ގައެވެ. މި ބިލާއި މެދު 29 އޯގަސްޓް 2008 ވަނަދުވަހު މަޖިލީހުގައި ތަޅުމުގައި މެންބަރުން ވާހަކަފުޅު ދެއްކެވުމަށް ފަހު، މެންބަރުން ފާޅުކުރެއްވި ހިޔާލުފުޅުކުރުމުގެ އަލީގައި އެބިލު އިސްލާހުކުރެއްވުމަށް ގައުމީ ތަރައްޤީގެ ކޮމެޓީއަށް ފޮނުއްވިއެވެ. އެކޮމިޓީން މިބިލު ނިމިގެން މަޖިލީހުގެ ތަޅުމަށްގޮސް ތަޅުމުން މިއަދު ފާސްކުރި ބިލުގައިވަނީ 90 މާއްދާއެވެ.

     މިބިލުގެ 1 މާއްދާގެ (ހ) ގައިވާ ބިލުގެ ތައާރަފުގައިވަނީ "މި ގާނޫނަކީ ދިވެހިރާއްޖޭގައި، ވަޒީފާއާބެހޭ އަސާސީ އުސޫލުތައް ކަނޑައަޅައި، ވަޒީފާދޭ ފަރާތްތަކާއި ވަޒީފާ އަދާކުރާ ފަރާތްތަކުގެ ހައްގުތަކާއި ޒިންމާތައް ކަނޑައަޅައި އެހައްގުތައް ހިމާޔަތްކޮށްދިނުމަށް، ލޭބަރ ރިލޭޝަންސް އޮތޯރިޓީއަކާއި ވަޒީފާއާބެހޭ ޓްރައިބިއުނަލެއް ގާއިމުކޮށް އަދި މިނޫންވެސް ވަޒީފާއާބެހޭ ގޮތުން ކުރަންޖެހޭ އެންމެހާ ކަންތައްތައް ކުރުމާބެހޭ ގާނޫނު" ކަމަށެވެ.

     މިބިލުގުގެ 21 ވަނަ މާއްދާކަމުގައިވާ "އެކަށީގެންވާ ސަބަބެއްނެތި ވަޒީފާއިން ވަކިކުރުން މަނާކުރުން" މި ބައިގައި ބުނަނީ މުވައްޒަފެއްގެ މަސައްކަތުގެ ގާބިލުކަން ނުވަތަ އަޚްލާގީ މިންގަނޑު ރަގަޅު ކުރުމަށް ފިޔަވަޅު އެޅުމަށްފަހުވެސް އޭނާގެ މަސައްކަތުގެ އަޚްލާގާއި ނުވަތަ އޭނާ ވަޒީފާ އަދާކުރާ ތަން ރަގަޅު ގޮތުގައި ހިންގުމާ ގުޅިފައިވާ އޭނާގެ ޒިންމާ އަދާ ނުކުރާ ކަމުގެ އެކަށީގެންވާ ސަބަބަކާ ލައިގެން މެނުވީ، ވަޒީފާ އަދާކުރަމުންދާ މުވައްޒަފަކު، އޭނާގެ ވަޒީފާއިން ވަކިކޮށްގެން ނުވާނެކަމަށެވެ. އަދި ވަޒީފާއިން ވަކިކުރެވޭނީ ވަކިކުރުމުގެ ކުރިން ނޯޓިސް ދިނުމަށް ފަހުގައިކަމަށް އެބިލުގެ 22 ވަނަ މާއްދާގައިބުނެއެވެ.

      "މުވައްޒަފަކު ވަޒީފާއިން ވަކިކުރުމާ ގުޅިގެން، އެމުވައްޒަފަކު ހުށަހަޅާ ޝަކުވާއެއް ނުވަތަ ދައުވާއެއްގައި، އޭނާ ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށްދިނުމަކީ ... ވަޒީފާދޭ ފަރާތުގެ ޒިންމާއެކެވެ. އެމުވައްޒަފަކު ވަޒީފާއިން ވަކިކުރި ސަބަބަކީ، އެކަށީގެންވާ ސަބަބެއް ކަމުގައި ވަޒީފާދޭ ފަރާތަށް ސާބިތުކޮށް ނުދެވިއްޖެނަމަ، އޭނާ ވަޒީފާއިން ވަކިކުރީ އެކަށީގެންވާ ސަބަބެއްނެތި ކަމުގައި ބެލެވޭނެ" ކަމަށް ބިލުގެ 27 ވަނަ މާއްދާގައި ވަޒީފާއިން ވަކިކުރި ސަބަބު ސާބިތުކޮށްދިނުމުގެ މާއްދާގައި ބަޔާންކޮށްފައިވެއެވެ. 

     ހަފްތާއެއްގެ ތެރޭގައި އާންމުކޮށް އެންމެ ގިނަވެގެން މަސައްކަތް ކުރެވޭ ގަޑިތައް ބަޔާންކޮށް ބިލުގެ 32 ވަނަ މާއްދާގެ (ހ) ގަވަނީ މިގާނޫނުގެ 34 ވަނަ މާއްދާގެ ދަށުން އިސްތިސްނާވާ މުވައްޒަފުން ފިޔަވައި، އިތުރުގަޑި ނުހިމެނޭގޮތުން، ހަފްތާއެއްގެ ތެރޭގައި އެންމެ ގިނަވެގެން 48 ގަޑިއިރަށްވުރެ އިތުރަށް އެއްވެސް މުވައްޒަފަކުލައްވާ މަސައްކަތްކުރުވައިގެން ނުވާނެކަމަށެވެ. ހަމައެހެންމެ 36 ވަނަ މާއްދާގައި ނަމާދުކުރުމުގެ ވަގުތާއި ހުސްވަގުތުގެ ދިނުމަށް ކަނޑައަޅާފައިވާ މާއްދާގެ (ހ) ގައި ވަޒީފާ އަދާކުރާ ކޮންމެ މީހަކަށްވެސް، ނަމާދު ކުރުމަށް، އެނަމާދެއްގެ ވަގުތު ފާއިތުނުވަނީސް، މަސައްކަތަށް ދަތިނުވާނޭ ގޮތުގެމަތިން 15 މިނިޓުގެ ހުސްވަގުތުކޮޅެއް ދޭންވާނެކަމަށް ބަޔާންކޮށްފައިވެއެވެ.

     "އަންހެން މުވައްޒަފަކު، ވިހާނެކަމަށް ލަފާކުރާދުވަސް ބަޔާންކޮށް، ރަޖިސްޓްރީކޮށްފައިވާ ސިއްހީ މަސައްކަތްތެރިޔަކު ދޫކުރާ މެޑިކަލް ސެޓްފިކެޓް ހުށަހެޅުމުން، އެ މުވައްޒަފަކަށް، ވިހެއުމާ ގުޅިގެންދޭ 60 ދުވަހުގެ ޗުއްޓީ ދޭންވާނެއެވެ. ވިހެއުމާ ގުޅިގެންދޭ ޗުއްޓީ ދިނުމުގައި ވިހާނެކަމަށް ލަފާކުރާ ދުވަހުގެ ކުރިން ހިނގާގޮތަށް ގިނަވެގެން ދެވޭނީ 30 ދުވަހުގެ ޗުއްޓީއެވެ. މިމާއްދާ މިހެން އޮތުމަކުން، ވިހެއުމާ ގުޅިގެންދޭ ޗުއްޓީ ފުރިހަމަނުކޮށް ވަޒީފާއަށް ނުކުތުމުން އެމުވައްޒަފަކަށް މަނައެއް ނުކުރާ" ކަމަށް ބިލުގެ 43 ވަނަ މާއްދާގައި މުވައްޒަފަކު ވިހެއުމާ ގުޅިގެން ދެވޭ ޗުއްޓީގައި ވެއެވެ. އެގޮތުން 45 ވަނަ މާއްދާގައި "ކުއްޖާ ބެލުމަށް ވަގުތު ދިނުން" ގައި ބުނަނީ މުވައްޒަފަކު، ވިހެއުމާ ގުޅިގެން ލިބޭ ޗުއްޓީ ހަމަކޮށް ވަޒީފާއަށް ނުކުންނަ ދުވަހުން ފެށިގެން ދަރިފުޅަށް ކޮށްދޭންޖެހޭ ކަންތައް ކޮށްދިނުމަށްޓަކައި މުސާރައިން ނުކެނޑޭގޮތުން، ކޮންމެ ދުވަހަކުވެސް ދަރިފުޅުގެ ގާތަށް ދިޔުމަށް 30 މިނެޓުގެ ހުސްވަގުތުކޮޅެއް ދުވާލަކު ދެފަހަރު ދޭންވާނެއެވެ. މިގޮތުގެމަތިން ހުސްވަގުތުކޮޅެއް ދިނުން ލާޒިމުވެގެންވަނީ ދަރިފުޅުގެ އުމުރުން 1 އަހަރު ފުރުމާ ހަމައަށެވެ. މިހެންނެވެ. ހަމައެހެންމެ މި ބިލުގެ 48 ވަނަ މާއްދާގައި ވިހެއުމުން ދެވޭ ޗުއްޓީ ގައި ފިރިހެން މުވައްޒަފަކަށް، ދަރިއަކު ލިބޭ ދުވަހުން ފެށިގެން، މުސާރަލިބޭގޮތަށް ތިންދުވަހުގެ ޗުއްޓީއެއް ހައްގުވާނެކަމަށާއި 49 ވަނަ މާއްދާގައި ހިތާނުކުރުމުން ދެވޭ ޗުއްޓީގެ ގޮތުގައި މުވައްޒަފެއްގެ ދަރިއަކު ހިތާނުކުރުމުން، އެދުވަހުން ފެށިގެން މުސާރަލިބޭގޮތަށް، 5 ދުވަހުގެ ޗުއްޓީއެއް އެ މުވައްޒަފަކަށް ހައްގުވާނެ ކަމަށް ބަޔާންކޮށްފައިވެއެވެ.

     އެންމެ ކުޑަމިނުން ދޭންވާނެ އުޖޫރަ ކަނޑައަޅާ އަމުރު ގެ މާއްދާއެއް ބިލުގައިވެއެވެ. އެގޮތުން އެމާއްދާ ގެ (ށ) ގައި އެންމެ ކުޑަމިނުން ދެވޭނެ އުޖޫރައާ ގުޅޭގޮތުން މިނިސްޓަރ ނެރޭ އަމުރުގައި، މުވައްޒަފެއްގެ މުސާރައިން ގަޑިއަކަށް ޖެހޭވަރާއި، މަސައްކަތުގެ ބަޔަކަށް ޖެހޭ އަދަދާއި، އިތުރުގަޑީގައި ލިބޭނެ މިންވަރު ކަނޑައެޅިދާނެކަމަށް ބަޔާންކޮށްފައި ވެއެވެ.

     މީގެ އިތުރުން މި ބިލުގައި ހިމެނޭ މުހިންމު މާއްދާތަކުގެތެރޭގައި މުވައްޒިފުންގެ ވާޖިބުތަކާއި ބެހޭ މާއްދާއާއި، މުއާމަލަތު ކުރެވޭނެ ފުރުސަތު ދިނުމުގެ މާއްދާއައި، ކުށާއި އަދަބުގެ މާއްދާ އާއި، ވަޒީފާއިން ވަކިކުރާއިރު އުޖޫރަ ދިނުމުގެ މާއްދާ ހިމެނެއެވެ.

    

ހިޔުމަންރައިޓްސް ކޮމިޝަނުގެ ރައީސް އާއި ނައިބްރައީސާއި މެންބަރުންނަށް ދެވޭ މުސާރައާއި އިނާޔަތްތައް އިތުރުކުރުމަށް ފާސްކޮށްފި

ހުސައިން ޒަބީރު (ހޒމވ)

ދިވެހި ރާއްޖޭގެ ހިޔުމަންރައިޓްސް ކޮމިޝަނުގެ ރައީސް އާއި ނައިންރައީސާއި މެންބަރުންނަށް ދެވޭ މުސާރައާއި އިނާޔަތްތައް އިތުރު ކުރުމަށް މިއަދު ފާސްކޮށްފިއެވެ.

އެ ކޮމިޝަނުގެ ރައީސް އާއި ނައިބްރައީސް ގެ އިތުރުން މެންބަރުންގެ މުސާރައާއި އިނާޔަތްތައް އިތުރުކުރުމަށް މާލިއްޔަތު ކޮމެޓީން އެކުލަވާލާފައިވާ ރިޕޯޓްގައި ހިޔުމަން ރައިޓްސް ކޮމިޝަނުގެ ރައީސްގެ މުސާރާގެ ގޮތުގައި 30000 (ތިރީސްހާސް) ރުފިޔާ ކަނޑައަޅާ، ނައިބްރައީސްގެ މުސާރައިގެ ގޮތުގައި 28،000 (އަށާވީސް ހާސް) ރުފިޔާ ކަނޑައަޅާ މެންބަރުގެ މުސާރައިގެ ގޮތުގައި 25،000 (ފަންސަވީސް ހާސް) ރުފިޔާ ދެއްވާގޮތަށް ހަމަޖައްސާފައިވެއެވެ. ހަމައެހެންމެ ދެވޭ އިނާޔަތުގެ ގޮތުގައި ލީވިގް އެލެވެސްގެ ގޮތުގައި ކޮމިޝަނުގެ ކޮންމެ މެންބަރަކަށް 15،000 (ފަނަރަ ހާސް) ރުފިޔާ ދިނުމަށާއި ރާއްޖެއާއި ސާކް ގައުމުތަކާއި އާސިޔާންގައުމުތަކުން ސިއްހީ ފަރުވާލިބޭފަދަ މެޑިކަލް އިންޝުރެސްންސް ސްކީމެއްގައި ކޮންމެ މެންބަރަކާއި އަނބިމީހާ ނުވަތަ ފިރިމީހާ އާއި އުމުރުން 18 އަހަރު ނުފުރޭ ދަރިން ބައިވެރިކުރެވޭ ގޮތަށް މަޖިލީހުން ފާސްކޮށްފައިވެއެވެ.

ކުރިން ރައްޔިތުންގެ މަޖިލީހުން ފާސްކޮށްފައިވާ ގޮތުގައި ހިޔުމަންރައިޓްސް ކޮމިޝަނުގެ ރައީސްގެ މުސާރައަކީ މަހަކު 23،000 (ތޭވީސް ހާސް) ރުފިޔާއެވެ. ނާއިބް ރައީސްގެ މުސާރައަކީ 20،500 (ވިހިހާސް ފަސްސަތޭކަ) ރުފިޔާއެވެ. ކޮމިޝަންގެ މެންބަރުންގެ މުސާރައަކީ ކޮންމެ މަހަކު 18،000 (އަށާވީސް ހާސް) ރުފިޔާއެވެ. އަދި ކޮންމެ މަހަކު އިނާޔަތުގެ ގޮތުގައި ކޮމިޝަނުގައި ހިމެނޭ ކޮންމެ މެންބަރަކަށް ވެސް 2،000 (ދެހާސް) ރުފިޔާ ލިބިވަޑައިގަނެއެވެ.

މާލިއްޔަތު ކޮމެޓީގެ މުގައްރިރު މާލޭ މެންބަރު މުހަންމަދު ޝިހާބު ރިޕޯޓް މަޖިލީހަށް އިއްވަވައި ދެއްވުމުން އެ ރިޕޯޓަށް ރިޔާސަތުން ވޯޓަށް އެއްސެވުމުން  ހާޒިރުވެވަޑއިގެން ތިއްބެވި 32 މެންބަރުންގެ ތެރެއިން 31 މެންބަރުން ފެނިވަޑައިގަންނަވާކަމަށް ވޯޓު ދެއްވިއެވެ. އަދި ފެނިވަޑައިނުގަންނަވާކަމަށް އެއްވެސް މެންބަރަކު ވޯޓު ދެއްވާފައި ނުވާއިރު ވަގިގޮތަކަށް ފެނިވަޑައިނުގަންނަވާކަމަށް ވޯޓު ދެއްވީ އެއްމެ މެންބަރެކެވެ. އެހެންކަމުން މަޖިލީހުގެ އަގްލަބިއްޔަތުން ރިޕޯޓް ފާސްވިއެވެ.

ހުސްވަގުތުކޮޅުގެ ކުރިން، 37 މެންބަރުން އަދި ހުސްވަގުތުކޮޅުގެ ފަހުން 38 މެންބަރުން ހާޒިރުވެވަޑައިގެންނެވި މިއަދުގެ ޖަލްސާގެ ރިޔާސަތު ބެލެހެއްޓެވީ، ރައްޔިތުންގެ މަޖިލީހުގެ ރައީސް އަލްފާޟިލް އަޙްމަދު ޒާހިރެވެ.

ސައުތު ފަޔާޒުގެ "ބަލި ކޮއްތު" މައްސަލަ

ސައުތު ތައުފީގް ބޭސްފަރުވާއަށް ސްރީލަންކާއަށް ދިޔުމުން މައްސަލަ ބާތިލު ކުރުމާ ވިދިގެން އަލުން އަނބުރާ މައްސަލަ ކޯޓަށް ހުށަހަޅުއްވައިފި

މުހައްމަދު އަޝްރަފް

ސައުތު ތައުފީގުގެ ދަރި ހަސަން ފަޔާޒު ބަދަލު ހޯދުމަށް ޑީޕީއާރުއެސްއާ ދެކޮޅަށް ކުރާ 1.1 މިލިއަން ރުފިޔާގެ ދައުވާގެ މައްސަލަ މަދަނީ ކޯޓުން ބާތިލްކުރުމާ ގުޅިގެން އަލުން އެމައްސަލަ ކޯޓަށް ހުށަހަޅުއްވައިފިއެވެ.

ނިމުނު މާރޗް މަހުގެ 23 ވަނަ ދުވަހު މިމައްސަލަ މަދަނީ ކޯޓުން ބާތިލް ކުރައްވާފައިވަނީ ހަސަން ފަޔާޒުގެ ބަދަލުގައި އަންނަންހުރި މުހައްމަދު ތައުފީގް ބަލިވެގެން ސްރީލަންކާއަށް ގޮސްފައިވަނީ މަގުބޫލް އުޒުރަކާ ނުލާކަމަށް ޝަރީއަތަށް ފެނިގެންނެވެ.

     މާފުށީގައި ހުންނަ ވަގުތީ ޖަލުގައި ތިބޭ ގައިދީން ބަލިވުމުން ޑޮކްޓަރު އަންގައިގެން ގެންދާ ހާއްސަ ކެއުން ނުވަތަ "ބަލިކޮއްތަށް" ހޭދަވާ ފައިސާ، އެ މަސައްކަތް ނަގާފައިވާ ސައުތު ތައުފީގުގެ ދަރި ހަސަން ފަޔާޒަށް ލިބެމުން ނުދާތީ ބަދަލު ހޯދުމަށް ޑީޕީއާރުއެސްއާ ދެކޮޅަށް ކުރާ މިދައުވާ އަލުން އަނބުރާ ކޯޓަށް ހުށަހަޅުއްވަމުން ސައުތު ފަޔާޒުގެ ފަރާތުން ވަކާލާތު ކުރައްވާ އަހުމަދު ޒަނީނު އާދަމް ވިދާޅުވީ މިދައުވާ އަލުން ކޯޓަށް ހުށާޙާޅާއިރު އެއްވެސް ބަދަލެއް ގެންނަވާފައިނުވާނެ ކަމަށެވެ.

     ދައުލަތުގެ ވަކީލު ވިދާޅުވީ މިމައްސަލާގައި ދައުވާ ކުރައްވާ ފަރާތުން ކޯޓަށް ހާޒިރުނުވެގެން ތިން ފަހަރު މައްސަލަ ބާތިލް ކުރައްވާފައިވާ ކަމަށެވެ. މިއީ މިގޮތަށް މިމައްސަލަ ބާތިލް ކުރައްވައިގެން ކޯޓަށް ހުށަހެޅުއްވި ތިން ވަނަ ފަހަރު ކަމަށްވެސް ވިދާޅުވިއެވެ.

     ސައުތު ފަޔާޒުގެ ފަރާތުން ވަކާލާތު ކުރައްވާ އަހުމަދު ޒަނީނު އާދަމާއި ތައުފީގާ ދެމެދު ޖެހުނު މައްސަލައަކާ ގުޅިގެން މިމައްސަލާގައި ޒަނީނު ދެން އިތުރަށް ވަކާލާތު ނުކުރައްވާނެ ކަމަށްވެސް ވިދާޅުވެފައިވެއެވެ. ނަމަވެސް ތިން ވަނަ ފަހަރަށްވެސް މިމައްސަލާގައި ވަކާލާތުކުރެއްވުމަށް ވަޑައިގެންނެވީ ޒަނީނުއެވެ.

މިއަދުގެ ޝަރީއަތުގެ މަޖިލީހުގައި ޒަނީނު ވަނީ މާފުށީގައި ހުންނަ ވަގުތީ ޖަލުގައި ތިބޭ ގައިދީން ބަލިވުމުން ޑޮކްޓަރުގެ އިރުޝާދާއެކު އެމީހުންނަށް ދިނުމަށްޓަކައި ސައުތުން ގެންދާ ހާއްސަ ކެއުން ކޭ މީހުންގެ ނަން ލިސްޓެއް ހުށަހަޅުއްވާފައެވެ.

ނަމަވެސް ގާޒީ ވިދާޅުވީ މިލިސްޓަކީ ހަމަ އެކަނި ޓައިޕްކޮށްލާފަ އޮތް ލިޔުމެއް ކަމަށާއި ޑީޕީއާރްއެސް އިން ފޮނުވައިގެން ކާންދިން ކަން އެނގޭ ލިޔުމެއް ހުށަހެޅުމަށް ވިދާޅުވިއެވެ. އަދި ދައުވާ ކުރާ ފަރާތުން ޔަގީނާ ގާތައް ލިޔެކިޔުންތައް ހުށަހެޅުމުން ނޫނީ މިމައްސަލަ ސާބިތު ކުރުމަށް ވަރަށް އުނދަގޫވާނެ ކަމަށްވެސް ވިދާޅުވިއެވެ.

ގާޒީ ވިދާޅުވީ ދައުވާ ކުރާ ފަރާތުން މިހާތަނަށް ހުށަހަޅުއްވާފައިވަނީ 2 މީހަކަށް ކާންދިން ކަން އެނގޭ މެނޫއަކާއި ސިޓީއެއް ކަމަށެވެ. އަދި އިތުރު ލިޔެކިޔުންތައް ހުށަހެޅުމަށް ދެން ދެވޭނީ އެންމެ ފުރުސަތެއް ކަމަށްވެސް ވިދާޅުވިއެވެ.

އަހުމަދު ޒަނީނު ވިދާޅުވީ 100 އަށްވުރެއް ގިނަ މީހުންނަށް ހާއްސަ ކެއުން ކާންދިން ކަން އެނގޭ ލިޔުމެއް ހޯމްމިނިސްޓްރީއިން ހޯދަމުންދާ ކަމަށެވެ. އަދި ގައިދީންނަށް ކާންދިނުމަށް އެންގެވި ބޭފުޅުން މިހާރުވެސް މާފުށީގައި އެބަތިއްބެވި ކަމަށާއި އޭގެތެރޭގައި ސީދާ މިކަން ކުރެއްވުމަށް ބޭފުޅުންވެސް އެބަތިއްބެވި ކަމަށެވެ. އެގޮތުން ހުޝާމް ނަމަކަށް ކިޔާ ބޭފުޅަކާއި ޒުބޭރު ނަމަކަށް ކިޔާ ބޭފުޅެއް ކޯޓަށް ހާޒިރު ކޮށްދެއްވުމަށް އެދިވަޑައިގެންނެވިއެވެ.

ހަސަން ފަޔާޒު ޑީޕީއާރުއެސްއާ ދެކޮޅަށް ކުރާ ދައުވާގައިވަނީ މާފުށީގައި ހުންނަ ވަގުތީ ޖަލުގައި ތިބޭ ގައިދީން ބަލިވުމުން ޑޮކްޓަރުގެ އިރުޝާދާއެކު އެމީހުންނަށް ދިނުމަށްޓަކައި ހާއްސަ ކެއުމެއްގެ ގޮތުގައި ގެންނަ މޭވާއަކީ މަސައްކަތުގެ އެއްބަސްވުމުގެ 7 ވަނަ މާއްދާގެ ދަށުން މަސައްކަތް ކުރުވާފާރާތުން އެދިގެން ގެންނަ އެއްޗެއްކަމަށާއި، އެހެނިހެން ކެއުންތަކަށް އުޖޫރަލިބޭ އުސޫލުން އެއަށްވެސް ފައިސާ ދައްކަން ޖެހޭނެކަމަށެވެ. ނަމަވެސް ކޮންމެ ފަހަރަކު ވަކިވަކިން މިތަކެއްޗަށް ބިލުކޮށް ޑީޕީއަރުއެސްއަށް ފޮނުވުމުންވެސް އެއަށް ފައިސާދައްކާފައިނުވާތީ އޭގެ ބަދަލު ހޯދުމަށް އެދޭ ކަމަށެވެ. އެގޮތުން ބަދަލުގައި އެއް މިލިޔަން އެއްލައްކަ ތޭވީސް ހާސް ތިންސަތޭކަ ހަތް ރުފިޔާ ބަދަލުގެ ގޮތުގައި ޑީޕީއަރުއެސްއިން ފަޔާޒަށް ދައްކަންޖެހޭ ކަމަށެވެ.  

 

މާލެތެރެ ޕެޓްރޯލްކުރަމުންދިޔަ ފުލުހުންތަކަކަށް މަސްތުވާތަކެތިކަމަށް ބެލެވޭ މުށިކުލައިގެ ތެޔޮ ޕެކެޓްތަކެއް ފެނިއްޖެ

ގައްމާޒު

މިދިޔަ ހޯމަދުވަހުގެރޭ މާލެތެރެ ޕެޓްރޯލް ކުރަމުން ދަނިކޮށް މަސްތުވާތަކެތިކަމަށް ޝައްކުކުރެވޭ މުށިކުލައިގެ ތެލެއްހުރި ރަބަރު ޕެކެޓްތަކެއް ފުލުހުންނަށް ފެނިއްޖެކަމުގައި ފުލުހުން ހާމަކޮށްފިއެވެ.

ފުލުހުންގެ ވެބްސައިޓުގައި މިއަދު ހާމަކޮށްފައިވާ ގޮތުގައި މިޕެކެޓްތައް ފެނުނީ ފުލުހުން ހިންގި ހާއްސަ އޮޕަރޭޝަނެއްގެ ތެރެއިންނެވެ.

އަނެއްކޮޅުން މަސްތުވާތަކެތި ބޭނުންކުރާ މީހެއްކަމަށް ތުހުމަތުކުރެވޭ މީހެއް ފުލުހުން އެރޭ ހައްޔަރުކޮށްފައިވެސް ވެއެވެ. މިމީހާއާއި ބެހޭ އިތުރު ތަފްސީލެއް އަދި ހާމަކޮށްފައިނުވިނަމަވެސް ފުލުހުން ބުނާގޮތުގައި މިމީހާ ހައްޔަރުކުރީ ސޯސަން މަގުގައި ހުރި ގެއެއްގެ ކައިރިންނެވެ. އަދި އޭނާ ޗެކްކޮށް ބެލިބެލުމުން މަސްތުވާތަކެތިކަމަށް ތުހަމަތުކުރެވޭ ޕެކެޓެއްވެސް ފެނިފައިވާކަމަށް ފުލުހުން ހާމަކުރެއެވެ.

މީނާ ހައްޔަރުކޯށްފައިވަނީ ހެންވޭރު ވިލީފުލުސްގެ ފުލުހުންކަމުގައިވެސް ފުލުހުންގެ ވެބްސައިޓުގައިވެއެވެ.

  

މައްޗަންގޮޅީ ގެޔެއްގެ ކޮޓަރިއެއް ތެރޭގައި މާބަނޑު އަންހެނަކު މަރުވެފައި އޮއްވާ ފެނިއްޖެ

ގައްމާޒު

މާލޭގެ ގެޔެއްގެ ކޮޓަރިއެއްގައި މާބަނޑު އަންހެނަކު މަރުވެފައި އޮއްވާ ފެނިއްޖެއެވެ. އިއްޔެ މެންދުރު ފަހު މއ.ރުތުގޭ ކޮޓަރިއެއްގައި މަރުވެފައި އޮއްވާ ފެނުނު އަންހެނަކީ އައްޑުއަތޮޅު ހިތަދޫ ދިލްދާރުގޭ މަރިޔަމް މުހައްމަދު،26 އަހަރުކަމުގައި ފުލުހުން ހާމަކުރެއެވެ.

     މައުލޫމާތު ލިބިފައިވާ ގޮތުގައި މިއަންހެން މީހާގެ ބަނޑަށް ހަމަސްވަރު ވެދާނެއެވެ. އަދި މީނާ މަރުވެފައި އޮއްވާ ފެނުނު ކޮޓަރިއަކީ މީގެ އެއްމަސްދުވަހެއްހާ ކުރިން މީނާ ކުއްޔަށް ހިފައިގެން އުޅޭ ކޮޓަރިއެކެވެ. މަރިޔަމްއަކީ މަސްތުވާތަކެތީގެ މައްސަލައެއްގައި މީގެ ތިންމަހެއްހާ ދުވަސްކުރިން ގޭގަ ބަންދުކޮށްފައި ހުރިމީހެއްކަމަށް އޭނާ ދިރިއުޅެމުންދިޔަ ގޭގެ މީހުންބުނެއެވެ. ނަމަވެސް މީނާ މަރުވެފައިވަނީ އޯވަޑޯޒްއެއް ވެގެންކަމަށް ނުބެލެވޭކަމަށްވެސް އެގޭމީހުން ބުނެއެވެ.

     ރުތުގޭ މީހުން ބުނާގޮތުގައި މީނާ މަރުވެފައި އޮއްވާ ފެނުނީ ކޮޓަރީގެ ކުޑަދޮރެއް ހަލާކުކޮށްލާފައި ހުރުމުން އެކަންވީގޮތް ބަލަން ކޮޓަރިއަށް ވަނުމުންނެވެ. ފުލުހުންގެ ވެބްސައިޓުގައި އިއްޔެ ހާމަކޮށްފައިވާ ގޮތުގައި މިއަންހެންމީހާ އައިޖީއެމްއެޗްއަށް ގެންގޮސް ޑޮކްޓަރުންނާއި ފުލުހުން ގުޅިގެން އިތުރަށް ބަލަންޖެހޭ ކަންތައް ބެލުމަށްފަހު މައްސަލަ މިހާރު ގެންދަވަނީ ތަހުގީގުކުރައްވަމުންނެވެ.   

ތްރީއޭ ކުންފުނި ބައިކުރިއިރު މަރްހޫމު މޫސާ ފަހީމަށް ބޮޑުބޭބެކިޔާ މީހެއްގެ ދެ އުޅަނދު ނުލިބިގެން ދައުވާ ކުރާ މައްސަލަ

 ދައުވާކޮށްފައިވަނީ ޒާތީ ގޮތުން އުނދަގޫކޮށް ބަދުނާމު ކުރުމުގެ ގޮތުން ކަމަށް މަރްހޫމު މޫސާ ފަހީމުގެ 8 ވާރިޘުން ބުނެފި

މުހައްމަދު އަޝްރަފް

މަޝްހޫރު ތްރީއޭ ކުންފުނީގެ އެއް ހިއްސާދާރުކަމަށްވާ މަރްހޫމު މޫސާ ފަހީމުގެ ވާރިޘުންގެ މައްޗަށް މަރްހޫމު މޫސާ ފަހީމަށް ބޮޑުބޭބެކިޔާ މއ ގުލެމަރ މުހައްމަދު އަނީސް ދައުވާކޮށްފައިވަނީ ޒާތީ ގޮތުން އުނދަގޫކޮށް ބަދުނާމު ކުރުމުގެ ގޮތުން  ކަމަށް މޫސާ ފަހީމުގެ ވާރިޘުންގެ ފަރާތުން ބުނެފިއެވެ.

ތްރީއޭ ކުންފުނި ބައިކުރުމަށް 1 ޖޫން 2006 ގައި ނިންމެވި ގަޒިއްޔާއިން ކުރެއްވި ހުކުމާ ގުޅިގެން މަރްހޫމު މޫސާ ފަހީމަށް ބޮޑުބޭބެކިޔާ މއ ގުލެމަރ މުހައްމަދު އަނީސްއަށް ހަމަޖެހުނު ކ އެރިޔަދޫ އައިލެންޑް ރިސޯޓުގައި ދުއްވުމަށާއި އ ވިލަމެންދޫ އައިލެންޑް ރިޒޯޓުގައި ދުއްވުމަށް ކުއްޔަށް މުހައްމަދު އަނީސްގެ ނަމުގައި ރަޖިސްޓްރީ ކޮށްދެއްވާފައިވާ އޭ.އޭ.އޭ.10 ސްޕީޑް ލޯންޗާއި، ބެލަންވިލާ ދޯންޏަން 1994 ފެބްރުއަރީމަހުން ފެށިގެން ކުލި ނުލިބިވާތީ އާއި މި ދެ އުޅަނދު މުހައްމަދު އަނީސްއާ ހަވާލުކޮށްފައިނުވާތީ، މުހައްމަދު އަނީސް އޭނާގެ ބޮޑުބޭބެގެ 8 ވާރިޘުންގެ މައްޗަށް ކުރާ މިދައުވާ އާ ގުޅިގެން މަރުހޫމް މޫސާ ފަހީމުގެ 8 ވާރިސުންގެ ފަރާތުން ވަކާލާތު ކުރައްވާ ވަކީލު އަބްދުލް މަތީން މިއަދު ވިދާޅުވީ މިދައުވާއަކީ އެއްވެސް އަސާސެއްގެ މައްޗަށް ބިނާކޮށް ހުށަހަޅުއްވާފައިވާ ދައުވާއެއް ނޫން ކަމަށެވެ. އަދި ތްރީއޭ ކުންފުނި ބައިކުރިއިރުވެސް މިފަދަ މުއާމަލާތެއް ކޮށްފައިނުވާ ކަމަށެވެ.

ދައުވާއަށް ޖަވާބްދާރީ ވުމުގެ ގޮތުން އަބްދުލް މަތީނު ދެއްކެވި ވާހަކާގައި ވިދާޅުވީ ދެ އުޅަނދެއް ކުއްޔަށް ދިނުމާ ބެހޭގޮތުން މޫސާ ފަހީމުގެ ވާރިޘުންނާއި މުހައްމަދު އަނީސްއާ ދެމެދު އެއްވެސް އެއްބަސްވުމެއް ކުރެވިފައިނުވާއިރު އެފަދަ ލިޔެކިޔުމެއްވެސް ދައުވާ ކުރައްވާ ފަރާތުން ޝަރީއަތައް ހުށަހަޅުއްވާފައިނުވާ ކަމަށެވެ. އަދި ދެ އުޅަނދެއް ކުއްޔަށް ދިނުމާ ބެހޭގޮތުން އެއްބަސްވުމެއްގައި ސޮއިކުރައްވާފައިވަނީ 1988 ވަނަ އަހަރުގައި ކަމަށް ދައުވާ ކުރާ މުހައްމަދު އަނީސް ބުނެފައިވާއިރު މިއުޅަނދު ރަޖިސްޓްރީ ކޮށްފައިވަނީ 1991 ވަނަ އަހަރުގައި ކަމަށްވެސް ވިދާޅުވިއެވެ.

އަނެއްކޮޅުން ވިލަމެންދޫ އައިލެންޑް ރިސޯޓުގައި ދުއްވުމަށް ކުއްޔަށް ދިން ކަމަށް ބުނާ އުޅަނދަކީ ވިލަމެންދޫ ރިސޯޓު ވުޖޫދުގައި ނެތީސް ރަޖިސްޓްރީކޮށްފައިވާ އުޅަނދެއް ކަމަށާއި އެއުޅަނދާއި ރިސޯޓާއި އޮތީ ކޮން ގުޅުމެއްތޯވެސް ސުވާލު ކުރެއްވިއެވެ.

އަބްދުލް މަތީން ވިދާޅުވީ ތްރީއޭ ކުންފުނި ބައިކުރިއިރު މިދެ އުޅަނދަކީ ބޭނުން ނުކުރެވޭ ވަރަށް ހަލާކުވެފައި އޮތް ދެ އުޅަނދު ކަމަށާއި މިދެ އުޅަނދު ހަލާކުވެފައި އޮތުމުން މުރްހޫމް މޫސާ ފަހީމުގެ ވާރިޘުންގެ ތެރެއިން އެއްވެސް މީހަކު މިދެ އުޅަނދުގެ ބޭނުން ކޮށްފައިނުވާ ކަމަށެވެ. އަދި މޫސާ ފަހީމުގެ ވާރިޘުންގެ ފަރާތުން މިދެ އުޅަނދު ދޫކުރުމަށް އެއްވެސް ހުރަހެއް އަޅުއްވާފައިނުވާނެ ކަމަށްވެސް ވިދާޅުވިއެވެ.

"މިއުޅަނދަކީ ކޮން ގޮތަކަށް ކޮން ހައިސިއްޔަތަކުން އެހެލާފައި އޮތް އެއްޗެއްކަން ނޭނގޭތީ އެދެ އުޅަނދު ބޭނުން ކޮށްފައެއްނުވޭ، މިދެ އުޅަނދު ގެންދިޔުމަށް (މުހައްމަދު އަނީސްއަށް) މިހާރު މިހާރަށްވެސް އަންގަން" އަބްދުލް މަތީން ވިދާޅުވިއެވެ.

މުހައްމަދު އަނީސްގެ ވަކީލު ވިދާޅުވީ މަރްހޫމް މޫސާ ފަހީމުގެ ވާރިޘުންގެ ފަރާތުން ދެއްކެވި ވާހަކަތަކަށް 10 ދުވަހުގެ ތެރޭގައި ލިޔުމަކުން ޖަވާބު އަރުއްވާނެ ކަމަށެވެ.

މިދައުވާ ހުށަހަޅުއްވާ ދެއްވަމުން މާޗް 23 ވަނަ ދުވަހު އަހުމަދު އަނީސްގެ ވަކީލު ވިދާޅުވީ އޭ.އޭ.އޭ އެންޑް ޓްރޭޑިންގ ކޮމްޕެނީއަށް ސަރުކާރުން ކުއްޔަށްދީފައިވާ ކ އެރިޔަދޫ ރިސޯޓާއި ވިޝަން މޯލްޑިވްސް ޕްރައިވެޓް ލިމިޓެޑަށް ސަރުކާރުން ކުއްޔަށްދީފައިވާ އ ވިލަމެންދޫ އައިލެންޑް ރިސޯޓުގައި ދުއްވުމަށް ކުއްޔަށް ދީފައިވަނީ 1988 ޖުލައި މަހުން ފެށިގެން ކަމަށާއި އެ ދެ ރިސޯޓުގައި މި ދެ އުޅަނދު މިހާރުވެސް ބޭނުން ކުރަމުންދާ ކަމަށެވެ.