އިސްމާއިލް
އެމްޑީޕީގެ ކުރީގެ ވަލީކޮމެޓީގެ މެމްބަރު އަދި މައްޝޫރު ދިވެހި އޮބްޒާވަރ ވެބްސައިޓުގެ އެޑިޓަރު އަހުމަދު ޝަފީގް (ޑީއޯ ސައްޕޭ) މިހާރު އިނގިރޭސި ވިލާތުގައި ހުންނެވުމުގެ ސަބަބުން އޭނާގެ ފަރާތުން އެމްޑީޕީން ކުރިއަށް ގެންދާ އެޕާޓީގެ ތަމްހީދީ އިންތިހާބުގައި ވޯޓުލާނެ މީހެއްކަމަށް އެމްޑީޕީގެ ގައުމީ މަޖިލީހުގެ މެމްބަރު އަދި އެއިންތިހާބުގައި ވާދަކުރައްވާ މުހައްމަދު ނަޝީދު (އަންނި)ގެ ކެމްޕޭން މެނޭޖަރ އަހުމަދު މައުސޫމު ހަމަޖައްސައިފިއެވެ.
އަންނިގެ ކެމްޕޭނު މެނޭޖަރު އަހުމަދު މައުސޫމް މިއަދު ވިދާޅުވީ ސައްޕޭގެ ޕްރޮކްސީ އޭނާއާ ހަވާލުކުރުމުން އެކަން އެމްޑީޕީގެ އޮފީހަށް އަންގަވާފައި ވާނެކަމަށާއި، އަދި އެޕްރޮކްސީ އެމްޑީޕީގެ އޮފީހުން ބަލައިގެންފައި ވާކަމަށެވެ. އަދި ސައްޕޭ ވޯޓު ދެއްވަން އެދިވަޑައިގެންފައިވަނީ މުހައްމަދު ނަޝީދު (އަންނި) އަށް ކަމަށްވެސް މައުސޫމް ވިދާޅުވިއެވެ.
"ސައްޕޭގެ ޕްރޮކްސީ އަޅުގަނޑާ ހަވާލުކުރީ އަންނި އަށް ވޯޓްލާން" މައުސޫމް ވިދާޅުވިއެވެ.
އިނގިރޭސި ވިލާތުގައި ހުންނަވާފައި މިނިވަން ނޫހަށް ދެއްވި ބަސްދީގަތުމެއްގައި ސައްޕޭ ވިދާޅުވީ މައުސޫމަކީ އޭނާ ވަރަށް އިތުބާރު ކުރާމީހެއް ކަމަށާއި، އޭނާގެ ވޯޓު މައުސޫމާ ހަވާލުކުރެއްވީ ވަކި މީހެއްގެ ސަޕޯޓަރެއް ވީމަ ނޫންކަމަށެވެ. އަދި މައުސޫމާ ސައްޕޭގެ ވޯޓް ހަވާލުކުރެއްވީ ސައްޕޭ އެދިވަޑައިގަންނަވާ ފަރާތަކަށް އެވޯޓު މައުސޫމް ލައިދޭނެ ކަމުގެ ޔަގީންކަން އޮތުމުންކަމަށްވެސް ސައްޕޭ ވިދާޅުވިއެވެ.
"އަހަރެންނަށް ޔަގީކަން އެބައޮތް އަހަރެން ބޭނުންވާ ފަރާތަށް އެވޯޓް މައުސޫމް ލައިދޭނެ ކަމުގެ. އަހަރެންގެ ޕްރޮކްސީ އަންނިއާ ހަވާލުކޮށްފަ މޫސައަށް ލައިދޭށޭ ބުންޏަސް އަންނި އެވޯޓް އެގޮތަށް ލައިދޭނެ" ސައްޕޭ ވިދާޅުވިއެވެ.
އެމްޑީޕީން މައުލޫމާތު ދޭގޮތުގައި އޭޕްރިލް 25 ގައި އޮންނަ އެޕާޓީގެ ރިޔާސީ ޕްރައިމަރީޒް 2008 އާއި ޗެއަރޕާސަން އިންތިހާބުގައި ޕްރޮކްސީވޯޓުގޮތުގައި ވޯޓުދޭނެ 261 މެމްބަރުންގެ ވޯޓު ރަޖިސްޓަރީ ކޮށްފައިވެއެވެ. މިޕްރޮކްސީވޯޓުތަކަކީ ޕާޓީގެ 17 މާޗް 2008 ގެ އިއުލާނުނަމްބަރު 12 އިން އެކަމަށް ފުރުސަތު ހުޅުވާލުމުން މެމްބަރުން ހުށަހަޅާފައިވާ ޕްރޮކްސީ ވޯޓުތަކެއް ކަމަށާއި، އެޕާޓީން ޕްރޮކްސީ ހުށަހެޅުމުގެ މުއްދަތުދީފައިވަނީ 5 އޭޕްރިލް ގެ ނިޔަލަށް ކަމަށްވެސް އެމްޑީޕީ އޮފީހުން މައުލޫމާތު ދިނެވެ. އެމްޑީޕީން އެއްވެސް މެމްބަރެއް ޕްރޮކްސީ ގޮތުގައި ވޯޓުހަވާލުކުރި ކުރުން އަބުރާގެންދިއުމަށް މިދިޔަ ބުރާސްފަތި ދުވަހުގެ ގެނިޔަލަށް ވަގުތުދީފައިވެއެވެ.
އެމްޑީޕީގެ އިންތިހާބާ ބެހޭ ކޮމެޓީގެ މުގައްރިރު މުހައްމަދު ރަޝީދު (ބިގޭ) މިއަދު ވިދާޅުވީ މިއަދާ ހަމައަށް މުޅިން ޔަގީން ކުރެވިފައިވާ ޕްރޮކްސީގެ އަދަކީ 247 ކަމަށެވެ. އަދި މުޅިން ޔަގީން ނުވާ ފޯމުތަކުގެ ތެރޭގައި ބަދަލުގައި ވޯޓްލާ މީހަކީ އެމްޑީޕީގެ މެމްބަރެއްކަން މުޅިން ޔަގީން ނުވާ 30 ފޯމް އޮތުމުން ބަދަލުގައި ވޯޓުލާނެ މީހެއްކަމަށް އެފޯމުތަކުގައި ބަޔާންކޮށްފައިވާ ނަންތައް ސައްހަ ކުރުމަށް އިލެކްޝަންސް ކޮމިޝަނަށް ފޮނުވާފައި ވާކަމަށްވެސް މުހައްމަދު ރަޝީދު ވިދާޅުވިއެވެ.
އެމްޑީޕީގެ އިންތިހާބުގައި ޕްރޮކްސީ ބޭނުންކުރުމާއި މެދު އެޕާޓީގެ ކެނޑިޑޭޓުންގެ މެދުގައި ވަނީ ހިޔާލު ތަފާތު ވެފައެވެ. ޕްރޮކްސީ ބޭނުންކުރުމާމެދު އެޕާޓީގެ ތަމްހީދީ އިންތިހާބުގައި ވާދަ ކުރައްވާ މުހައްމަދު މުނައްވަރު ހިތްހަމަ ޖެހިވަޑައިނުގަންވާކަން ހާމަކުރައްވާފައި ވާއިރު އެއިންތިހާބުގެ އެހެން ކެންޑިޑޭޓެއްކަމަށްވާ މުހައްމަދު ނަޝީދު އަންނިވަނީ ޕްރޮކްސީއަކީ އެޕާޓީގެ އަސާސީ ގަވާއިދުން އެޕާޓީގެ މެމްބަރުންނަށް ލިބިދޭ ހައްގެއް ކަމަށާއި، އަދި އެމްޑީޕީން ބާއްވާފައިވާ އެހެން ހަރަކާތްތަކުގައިވެސް ޕްރޮކްސީ ބޭނުން ކޮށްފައިވާކަން ފާހަގަ ކުރައްވާފައެވެ.
އެމްޑިޕީގެ އަސާސީ ގަވާއިދުގެ 4 ވަނަ މާއްދާ ބުނާ ގޮތުން އެޕާޓީގެ މެމްބަރުންނަށް ލިބިދެވޭ ވޯޓުލުމުގެ ހައްގު ބޭނުންކުރުމުގައި، އެމެމްބަރަކަށް "..ވޯޓުލުމަށްޓަކާ ކަޑައެޅިފައިވާތަނަށް ހާޒިރުވުމަށް އުޒުރުވެރިވެއްޖެނަމަ، އޭނާގެބަދަލުގައި ޕާޓީގެ އެހެން މެމްބަރަކު އޭނާގެވަކީލެއްގޮތުގައި އައްޔަންކޮށް، އޭނާގެބަދަލުގައި ވޯޓުލުމަށް ހުއްދަދެވިދާނެއެވެ. އެހެން ނަމަވެސް "..މިގޮތަށް ބަދަލުގައި ވޯޓުދޭދިނުމުގައި ކޮންމެ މެމްބަރަކަށްވެސް ވޯޓުދެވޭނީ ގިނަވެގެން އިތުރު އެއް މެމްބަރުގެ ވަކީލެއްގެ ގޮތުގައި" ކަމުގާވެސް ބުނެއެވެ.
