ދެ ދައުރަށްވުރެ ގިނަ ދުވަހު ވެރިކަން ކޮށްފައިވާ މީހަކަށް ރައީސުލްޖުމްހޫރިއްޔާގެ މަގާމަށް ކުރިމަތި ނުލެވޭގޮތަށް އިސްލާހުކުރެވޭ ގާނޫނު އަސާސީގައި ފާސްކުރެވިފައި އޮއްވާވެސް މައުމޫނު އަބްދުލްގައްޔޫމު ރައީސްކަމަށް އަލުންވެސް ކުރިމަތިލައްވާނެކަމަށް ވިދާޅުވަމުން ގެންދަވާތީ ކުރެވުނު ސުވާލެއްގެ ޖަވާބުގައި "އަޅުގަޑުމެން ބޭނުންވަނީ މައުމޫނު ކުރިމަތިލައްވަން" ކަމުގައި އެމްޑީޕީގެ ތަމްހީދީ އިންތިޚާބުގައި ވާދަކުރައްވަމުން ގެންދަވާ މުހަންމަދު ނަޝީދު (އަންނި) ވިދާޅުވެއްޖެއެވެ.
"އެ މަނިކުފާނަށް ކުރިމަތިލެއްވޭނެ ގާނޫނީ ހަމައެއް ނެތްކަމުގައިވިޔަސް މައުމޫނު އަވިދާޅުވަނީ ކުރިމަތި ލައްވާނަމޭ، ގާނޫނު އަސާސީއާ އެކިއިރު އެކި ދަރަޖައަށް އެކިވަރަށް ޚިލާފުވެ ވަޑައިގަންނަވަމުން ގެންދަވާ ބޭފުޅަކަށްވާތީ އެއަކީ އާ ވާހަކައެއް ނޫން. ދަންނަވަންތޯ އަޅުގަޑުމެން ބޭނުންވަނީ އަދި އަޅުގަޑުމެންނަށް ރަގަޅީވެސް މައުމޫނު ކުރިމަތިލެއްވުން"، އަންގާރަދުވަހު ކުޑަހުވަދޫގައި ވާހަކަ ދައްކަވަމުން އަންނި ވިދާޅުވިއެވެ.
އެމްޑީޕީގެ ތަމްހީދީ އިންތިޚާބުގައި އޭނާގެ ރިޔާސީ ކެންޕެއިން ނިލަންދު އަތޮޅުގައި ކުރިއަށް ގެންދަވަމުން މުހަންމަދު ނަޝީދު ވަނީ ދ އަތޮޅުގެ ކުޑަހުވަދޫއަށާއި ހުޅުދެލި އަދި ރިނބުދޫއަށް އަންގާރަދުވަހު ޒިޔާރަތް ކުރައްވާފައެވެ. ފ އަތޮޅު މަގޫދޫ، ބިލެތްދޫ އަދި ފީއައްޔަށް އޭނާ ޒިޔާރަތްކުރެއްވީ ބުދަ ދުވަހުއެވެ.
އިތުރު ދައުރަކަށް މައުމޫނު ކުރިމަތިލެއްވުން އެއީ ބައިނަލްއަގްވާމީ ފަރާތްތަކުން ވަރަށް ހުތުރުކަމެއް ކަމަށް ދެކޭނެ ކަމެއް ކަމަށާއި، ދެ ދައުރަށްވުރެ ގިނަ ދުވަހު އެއްވެސް މީހަކު ވެރިކަމުގައި ދެމިހުރުމަކީ ރާއްޖޭގެ އަމަން އަމާންކަމަށާއި ސުލްހަ މަސަލަސް ކަމަށާއި، އަދްލު އިންސާފަށާއި، އިގްތިސާދަށް ހުރަސް އެޅޭނެ ކަމެއް ކަމުގައި ދެކިވަޑައިގަންނަވަމޭ ވިދާޅުވެފައި، ހަ ދައުރުވެރިކަން ކުރައްވާފައިމެ އަނެއްކާވެސް ކުރިމަތިލެއްވުން އެއީ ދުރޫސުލްއަޚްލާގުގެ މިންގަޑުތަކުން ބެއްޔަސް ވަރަށް މުޑުދާރު އިއްޒަތެއްނެތް އަމަލެއްކަމުގައި ނަޝީދު ވިދާޅުވިއެވެ.
"އަޅުގަޑުމެންނަށް މޮޅުވާން އެންމެ ފަސޭހަވާނީ ސީދާ މައުމޫނާ ވާދަކޮށްގެން. އަބަދުވެސް ބުނަމުން މިއަންނަނީ އެބޭފުޅާއާ ވާދަކުރާނަމޭ. އަޅުގަޑުމެން މިއޮއްހާދުވަހު ވާދަކުރަމުން މިއައީ އެބޭފުޅާއާ. މާތް އަމުރާ އިރާދަފުޅާއެކު 2008 ނޮވެމްބަރު 11 ވާ ދުވަހު މި ރާއްޖޭގެ ރައީސުލް ޖުމްހޫރިއްޔާކަމުގެ ހުވާކުރައްވާނީ އެމްޑީޕީ ހިމެނޭ އިއްތިހާދުގެ ވެރިއެއް." ކަމުގައި ނަޝީދު ވިދާޅުވިއެވެ.
އަނެއްކޮޅުން ޑީއާރުޕީއަށް ނިސްބަތްވާ ދެމަޖިލީހުގެ މެންބަރުންނާއެކު ރޭ ދަރުބާރުގޭ ފާށަނާ މާލަމުގައި ބޭއްވި ބައްދަލު ކުރެއްވުމުގައި ޕާޓީގެ ޒައީމް އަލްއުސްތާޛު މައުމޫން ޢަބްދުލްޤައްޔޫމް ދެއްކެވި ވާހަކަ ފުޅުގައި ރައްޔިތުންގެ ދެ މަޖިލީހަށް ނިސްބަތްވެ ވަޑައިގަންނަވާ ޑީއާރުޕީ މެންބަރުންނާ މުޚާޠަބްކޮށް ވިދާޅުވީ، މިހާރު ކުރެވެމުންދާ އެންމެ މުހިންމު އެއްކަމަކީ ޤާނޫނުއަސާސީ އިޞްލާޙް ކުރެއްވުމުގެ މަސައްކަތް ކަމަށާއި، މިމަސައްކަތުގައި އެބޭފުޅުން ވެ ވަޑައިގަންނަވަނީ ވަރަށް ބޮޑެތި ޤުރުބާނީތަކެއް ކަމަށް ދެކެވަޑައިގަންނަވާކަމަށެވެ. އިސްލާހުކުރެވޭ ޤާނޫނު އަސާސީ ތަސްދީޤުވުމާއެކު މިހާރުގެ ޤާނޫނު އަސާސީ އުވޭނެކަމަށް ފާސްކުރި ފާސްކުރުމަށް އިޝާރާތްކުރައްވަމުން ޕާޓީގެ ޒަޢީމް ވިދާޅުވީ މިމަހުގެ 13 ވަނަ ދުވަހު ޚާއްޞަ މަޖިލީހުގައި ޤާނޫން އަސާސީގެ އިންތިޤާލީ ބާބަށް ނެގުނު ވޯޓްގައި ޑީއާރުޕީގެ މެންބަރުން ސާބިތުކޮށްދެއްވި ޢަޒުމާއި، ހަރުދަނާކަމަކީ މުޅި ދިވެހި ރައްޔިތުން ފާހަގަކުރާނޭ ކަމެއް ކަމުގައިއެވެ.
ޒަޢީމް ވިދާޅުވީ މަޖިލީހުގައި ސަރުކާރާއިދިކޮޅު މެންބަރުން އެ މަސައްކަތް ކުރައްވަމުން ގެންދަވަނީ އެއްބޭނުމެއްގައިކަމަށާއި، އެއީ ޤާނޫނުއަސާސީ ފާސްވިޔަ ނުދިނުމަށްޓަކާ ކަމަށް އެމަނިކުފާނު ދެކެވަޑައިގަންނަވާކަމަށާއި، ނަމަވެސް މިއީ ދިވެހި ރައްޔިތުން ޤަބޫލުކުރާނޭ ގޮތެއް ނޫންކަމަށާއި، ޤާނޫނުއަސާސީ އަކީ ރައްޔިތުން ވަރަށްބޮޑު ޝައުޤުވެރިކަމާއެކު އިންތިޒާރު ކުރައްވަމުން ދާ އެއްޗެއްކަމަށާއި މި މަސައްކަތް މަޖިލީހުގެ މެންބަރުން ކުރައްވަމުންގެންދަވާތާ ވަރަށްގިނަ ދުވަސްތަކެއް ވެއްޖެކަމަށާއި، އެހެންވީމާ މިމަސައްކަތަށް މިހާރު މާގިނަ މުއްދަތެއް ނަގަން ނުޖެހޭ ކަމަށާއި މި މަސައްކަތް މިހާރު ނިމެންވެއްޖެ ކަމަށްޕާޓީގެ ޒަޢީމް އިޝާރާތް ކުރެއްވިއެވެ.
މިދިޔަ އާދީއްތަދުވަހު އޮތް ރައްޔިތުން ހާއްސަ މަޖިލީހުގެ މެންދުރު ފަހުގެ ޖަލްސާގައި އަނީސާ އަހުމަދު ހުށަހަޅުއްވާ މުހައްމަދު އަނިލް ތާއީދު ކުރެއްވައިގެން ފާސްވި ހުށަހެޅުން 20 ކަމަށްވާ "އަމަލުކުރަން ފެށުމުގައި" ބަޔާންކޮށްފައިވަނީ، "(ހ) މި ޤާނޫނުއަސާސީއަށް އަމަލުކުރަން ފަށާނީ، މިޤާނޫނުއަސާސީ ރައްޔިތުންގެ ހާއްސަ މަޖިލީހުން ފާސްކޮށް ރައީސުލްޖުމްހޫރިއްޔާ ތަސްދީގުކޮށް ސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެންނެވެ. (ށ) މި ޤާނޫނުއަސާސީއަށް އަމަލުކުރާ ދުވަހުން ފެށިގެން، 1 ޖަނަވަރީ 1998 ގައި އަމަލުކުރަން ފަށާފައިވާ "ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ" އުވުނީއެވެ. (ނ) މިމާއްދާގެ (ހ) ގައި އެހެން އޮތްނަމަވެސް މިގާނޫނު އަސާސީގެ ދަށުން ރައީސުލްޖުމްހޫރިއްޔާއާއި ރައްޔިތުންގެ މަޖިލިސް އިންތިހާބުކުރެވެންދެން މި ބާބުގައި ބަޔާންކޮށްފައިވާ ކަންތައްތަކަށް އަމަލުކުރެވޭނީ މިބާބުގައި ކަނޑައެޅިގެން ބަޔާންކޮށްފައިވާ ގޮތަށް" ކަމަށެވެ.
މިވޯޓަށްފަހު ޑީއާރުޕީ ޕާލިމެންޓަރީ ގްރޫޕްގެ ރައީސާ އަނީސާ އަހްމަދު މިނިވަން ނިއުސްގައި ވިދާޅުވީ "ދެން އަންނަ އިންތިޚާބެއްގައި ގައްޔޫމަށް ކުރިމަތިލެވޭނެކަމާމެދު އެއްވެސް ސުވާލެއް މިހާރު ނެތް" ކަމަށެވެ.
