އެމްޑީޕީ ތަމްހީދީ އިންތިޚާބް:
ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ތަމްހީދީ އިންތިޚާބުގައި ވާދަ ކުރައްވާ މުހައްމަދު ނަޝީދު (އަންނި) އަށް ދިވެހި ރާއްޖޭގެ ވެރިކަން ލިބިވަޑައިގެންފިނަމަ 60 އަހަރު ވެރިކަމުގައި ދެމިހުންނަވާނެ ކަމަށް މުނައްވަރު ކެމްޕެއިންގައި ރޭ ވާހަކަދެއްކެވި ލަވަކިޔާ މުޚްތާރު އާދަމް ބުނެފިއެވެ.
އިންތިޚާބުގައި ވާދަކުރައްވާ 3 ކެންޑިޑޭޓުކުރެން ޑރ މުހައްމަދު މުނައްވަރު އިމާދުއްދީން ސްކޫލުގައި ހުކުރުދުވަހުގެ ރޭ ބޭއްވެވި ޖަލްސާގައި ވާހަކަ ދައްކަމުން މުނައްވަރަށް ތާއީދު ކުރާ ހދ ކުޅުދުއްފުށީ ބޮޑު މުހައްމަދަށް ކާފަ ކިޔާ މަޝްހޫރު ލަވަކިޔުންތެރިޔާ މުހުތާރު އާދަމް ބުނީ އަންނި 60 އަހަރު ވެރިކަމުގައި ދެމިހުންނަވާނީ އެބޭފުޅާއަކީ އެހާ ބޯ ބޮޑު ބޭފުޅަކަށްވާތީ ކަމަށެވެ.
"އަންނި އަޅުގަނޑުމެންގެ ވެރިކަމަށް އަރައިފިއްޔާ އެބޭފުޅާ 60 އަހަރު ވަންދެކަން ރާއްޖޭގެ ވެރިކަމުގައި ދެމިހުންނާނެ، ދެން ކާކުތޯ އެބޭފުޅާ ބާލަން ނިކުންނާނީ، 60 އަހަރު އަންނި ދެމިހުންނާނެ ރާއްޖޭގެ ވެރިކަމުގައި، އެއީ އޭނަ އެހާ ބޯ ރަނގަޅު ވީމަ އެނގޭތޯ، އެހެންވީމަ އެހާ ބޯ ރަނގަޅު ބޭފުޅު އަޅުގަނޑުމެން ބަހައްޓަން ޖެހޭނީ އަޅުގަނޑުމެންގެ ސަލާމަތަށްޓަކައި، އެހެންވީމަ އެބޭފުޅާ ބަހައްޓަންވީ ވެރިންގެ ވެރިޔަކަށް" މުހުތާރު ވިދާޅުވިއެވެ.
މުހުތާރު މިހެން ބުނުމާ ގުޅިގެން ޖަލްސާގެ ތެރެ ހަލަބޮލިވެގެން ދިޔައެވެ. ނަމަވެސް މުހުތާރު ބުނީ ސިޔާސީ ދާއިރާގައި ބަޔަކު އޭނައާ ދިމާއަށް އެއްޗެކޭ ކިޔައިގެން އޭނާ އަޖައިބެއް ނުވާނެ ކަމަށެވެ.
ޖަލްސާއަށް ދިޔަ ބައެއް ފަރާތްތަކާ މިނިވަނުން ސުވާލު ކޮށްލުމުން ބުނެފައިވަނީ އެމްޑީޕީގެ ކެމްޕޭނު ޖަލްސާއެއްގައި ވާދަކުރާ އެހެން ކެންޑިޑޭޓެއްގެ ނަން ކަނޑައެޅިގެން ގަނެ، މިފަދަ ވާހަކައެއް ބުނި މިއީ ފުރަތަމަ ފަހަރު ކަމަށެވެ. އަދި ގާނޫނު އަސާސީގައި ރައީސްކަމުގެ ދައުރު ދެ ދައުރަށް ކަނޑައެޅުމަށް އެމްޑީޕީން ކުރި މަސައްކަތުގައި އަންނި ވަރަށް ބޮޑު ދައުރެއް އަދާކުރައްވާފައިވާއިރު މިފަދަ ވާހަކައެއް ކަނޑައެޅިގެން އަންނިއާ ދިމާއަށް ބުނެވިގެން ނުވާނެ ކަމަށްވެސް ބައެއް މީހުން ބުނެފައިވެއެވެ. މީގެ ކުރިން މުނައްވަރު ކޭމްޕަށް ނިސްބަތްވާ އެހެން އެމްޑީޕީ މެންބަރެއްކަމަށްވާ އެމްޑީޕީގެ ހިޔަނި ކެބިނެޓްގެ ސެކެޓްރީ އިބްރާހިމް ދީދީ (ކޭޑީ) އަށް ނިސްބަތްކުރާ ރިކޯޑިންގއެއްގައި އަންނިއަކީ "ކެނެރީގޭ ކުއްތާއެއް" ކަމަށް ބުނެފައިވާތީ މުނައްވަރު ވިދާޅުވެފައިވަނީ އެއްވެސް ކެންޑިޑޭޓަކާ ދިމާއަށް ބަދުބަހެއް ބުނުމަށް އޭނާ އެދިވަޑައިނުގަންނަވާކަމަށެވެ.
ނަމަވެސް އަންނިއަށް ނިސްބަތްކޮށް މުހުތާރު މިހެން ބުނެފައިވަނިކޮށް ޑރ މުހައްމަދު މުނައްވަރު އެވާހަކައާ ދެކޮޅަށް އެއްޗެއް ވިދާޅުވެފައިނުވާތީވެސް ވަރަށް ގިނަ ބަޔަކު ހިތްހަމަނުޖެހުން ފާޅުކޮށްފައިވެއެވެ. ބައެއް މީހުން ބުނި ގޮތުގައި މުހުތާރުގެ ވާހަކައަށް ރައްދުދިނުމުގެ ގޮތުން އެމްޑީޕީގެ ރައީސްގެ ހައިސިއްޔަތުން ޑރ މުނައްވަރު އެއްޗެއް ވިދާޅުވާންޖެހޭނެއެވެ. އަދި ގާނޫނު އަސާސީ އިސްލާހު ކުރެއްވުމުގެ މަސައްކަތުގައި އަންނި ވަނީ ވަރަށް ބުރަ މަސައްކަތްތަކެއް ކުރައްވާފައިކަން ހުދް މުނައްވަރަށްވެސް އެނގިލައްވާނެ ކަމަށް އެފަރާތްތަކުން ބުނެފައިވެއެވެ.
ކަންމިހެންހުރިއިރު ޖަލްސާގައި މުނައްވަރު ވާހަކަ ދައްކަވަން ފެއްޓެވުމުން ބައެއް މީހުން ވަނީ ޖަލްސާ ދޫކޮށް ބޭރަށް ނިކުމެފައެވެ. އަދި ކުރިން މުނައްވަރަށް ސަޕޯޓު ކުރި ބައެއް މީހުން މިމައްސަލާގެ ސަބަބުން މުނައްވަރަށް އޮތް އިތުބާރު ގެއްލިފައިވާ ކަމަށްވެސް ހާމަކޮށްފައިވެއެވެ.
ރޭގެ ޖަލްސާގައި އާންމު މެންބަރަކު މުނައްވަރާ ސުވާލު ކުރައްވަމުން ބުނީ ޑރ މުނައްވަރަކީ ރައީސް މައުމޫނުގެ ވެރިކަމުގައި 10 އަހަރު ވަންދެން ބަންޑާރަ ނާއިބުގެ މަގާމުގައި ހުންނަވައިގެން ވަރަށް ގިނަ ބަޔަކަށް ބޭއިންސާފުން އަދަބު ދެއްވާފައިވާ ބޭއްފުޅެއް ކަމަށާއި ވުމާއެކު ކުރިއަށް އޮތް ތާނގައި ރައީސުލްޖުމްހޫރިއްޔާ ކަމުގެ މަގާމަށް މުނައްވަރު އަރާ ވަޑައިގެން ކަމުގައި ވީނަމަވެސް އެކަންތަކާ ގުޅިގެން މުނައްވަރުގެ މައްޗަށް ދައުވާ ކުރެއްވިދާނެތޯއެވެ. މީގެ ޖަވާބުގައި މުނައްވަރު ވިދާޅުވީ އޭނާގެ މައްޗަށް އެއްވެސް މައްސަލައަކާ ގުޅިގެން ތުހުމަތު ކުރެވޭ ނަމަ ލަސް ނުކުރައްވާ ދައުވާ ކުރެއްވުމަށެވެ.
"އަޅުގަނޑުވެސް އަދި އެހެން މީހަކުވެސް ކުށެއް ކޮށްފަ އޮތްކަމަށް ވާނަމަ އެމީހެއްގެ މައްޗަށް ދައުވާ އަބަދުވެސް ކުރަންޖެހޭނެ، އަޅުގަޑުގެ ދިފާއުގައި ހުންނާނެ ދައްކާނެ ކިތައްމެ ވާހަކައެއް، ކޮންމެ ހެން މަޑުކުރައްވާނެ ކަމެއް ނެތޭ އަޅުގަނޑު މަގާމަކާ ހަވާލުވަންދެކަން އަޅުގަނޑު ކުށެއްކޮށްފަ އޮތްކަން އެނގިވަޑައިގަންނަވާ ކަމުގައިވާނަމަ މިހާރުވެސް ދައުވާ ކުރަންވީއޭ" މުނައްވަރު ވިދާޅުވިއެވެ.
ރޭގަ ޖަލްސާގައި މުނައްވަރަށް ތާއީދު ކުރައްވާ ރައްޔިތުންގެ މަޖިލީހުގެ އައްޑޫ މެންބަރު މުހައްމަދު އަސްލަމްވެސް ވާހަކަ ދައްކަވާފައިވެއެވެ. އޭނާ ވިދާޅުވީ މުނައްވަރަށް ތާއީދު ކުރެއްވީ މިނިވަން މުސްތަގިއްލު ބޭފުޅަކަށްވާތީ ކަމަށެވެ. އަސްލަމްގެ އިތުރުން ރޭގެ ޖަލްސާގައި ވާހަކަދެއްކެވީ އަބްދުﷲ މުއާޒްއާއި، އެމްޑީޕީގެ ކުޑަހެންވޭރު ގޮފީގެ ރައީސް އައްބާސް އާދިލް ރިޒާއާއި، ފިލްމް ޕްރޮޑިއުސަރު މުހައްމަދު ނިއާޒް (ޓެޑްރީ) އެވެ.