"ސީނިއަރ މިނިސްޓަރު" ކިޔާ އާ މަގާމަކަށް 5 ބޭފުޅަކު އަދި ދިވެހި ދައުލަތުގެ މިނިސްޓަރ ކަމުގެ މަގާމަށް ހަތަރު ބޭފުޅަކު ރައީސުލްޖުމްހޫރިއްޔާ އަލްއުސްތާޛު މައުމޫން ޢަބްދުލްޤައްޔޫމް އިސްކުރައްވައި، އެބޭފުޅުންނަށް މަގާމުގެ ފަތްކޮޅު ބުރާސްފަތިދުވަހު ދެއްވައިފިއެވެ.
މިއަދު 11 ޖެހިއިރު ރައީސުލްޖުމްހޫރިއްޔާގެ އޮފީހުގައި ބޭއްވި ރަސްމިއްޔާތެއްގައި ސީނިއަރ މިނިސްޓަރ ކަމުގެ މަގާމަށް އިސްކުރެއްވީ، ޑޮކްޓަރ މުޙަންމަދު ޒާހިރު ޙުސައިނާއި، ކުރީގެ އެޓޮލޮސް މިނިސްޓަރު ޢަބްދުﷲ ޙަމީދާއި، ޢުމަރު ޒާހިރުއެވެ. އަދި ސްޕެޝަލް އެޑްވައިޒަރ ޓު ދަ ޕްރެޒިޑެންޓް ކަމުގެ މަގާމުގައި ތިއްބެވި އަލްފާޟިލް ކޮލި ޢަލީ ޢުމަރު މަނިކާއި، އަލްއުސްތާޛު ފަތުޙުﷲ ޖަމީލުވެސް ސީނިއަރ މިނިސްޓަރުގެ މަގާމަށް އިސްކުރައްވާ ގޮތަށް ރައީސުލްޖުމްހޫރިއްޔާ ވަނީ ހަމަޖައްސަވާފަ ކަމަށް ރައީސް އޮފީހުން މައުލޫމާތުދެއެވެ. އެހެން ނަމަވެސް، އެބޭފުޅުން މިވަގުތު ރަށުގައި ވަޑައިގެން ނެތުމާއެކު، އެބޭފުޅުންނަށް މަގާމުގެ ފަތްކޮޅު ދެއްވުމާއި ހުވާކުރެއްވުން، އެބޭފުޅުން ރާއްޖެ ވަޑައިގަތުމުން ބާއްވަވާގޮތަށް ވަނީ ހަމަޖައްސާފަ ކަމަށް އެއޮފީހުން މައުލޫމާތުދެއެވެ.
ދިވެހި ދައުލަތުގެ މިނިސްޓަރ ކަމުގެ މަގާމަށް އިސްކުރެއްވީ، އަލްފާޟިލް ޢަބްދުއްރަޝީދު ޙުސައިނާއި، އަލްފާޟިލް އިބްރާހީމް ޙުސައިން މަނިކު (ސަމަރޭ)އާއި، އަލްފާޟިލާ ރާޝިދާ ޔޫސުފާއި، އަލްފާޟިލް ޢައްބާސް އިބްރާހީމެވެ.
މިއަދު ހުވާކުރެއްވި ދައުލަތުގެ މިނިސްޓަރުން ކުރެން 3 ބޭފުޅަކު ތިއްބެވީ ރައީސް އޮފީހުގެ ދަށުން ހިނގާ އެކަހެރި މަޖިލިސް ތަކުގެ ވެރިންގެ ގޮތުގައެވެ. ޢަބްދުއްރަޝީދު ޙުސައިން ހުންނެވީ ފަބްލިކް އެންޓަރޕްރައިޒަސް ކޮމިޝަންގެ ޗެއާމަންކަމުގައެވެ. އަދި ހަޔާ އެޑިއުކޭޝަން އެންޑް ސޯޝަލް ސެކިއުރިޓީވެސް ހަވާލުކޮށްފައިވަނީ މީނާއާއެވެ. ރާޝިދާއަކީ ތައުލީމާބެހޭ ގައުމީ މަޖިލީހުގެ ރައީސާއަށް ވާއިރު ސަމަރުބުލޫ އިބްރާހިމް މަނިކަކީ ކޮމިއުނިޓީ އޯގަނައިޒޭޝަންގެ ޗެއާމަނެވެ. އައްބާސް އިބްރާހީމަކީ ދިވެހިބަހާ ތާރީޚަށް ޚިދްމަތްކުރާ ގައުމީ މަރުކަޒުގެ ރައީސްއެވެ. މިބޭފުޅުންނަށް ދައުލަތުގެ މިނިސްޓަރުކަން ލިބުނަސް ކުރައްވާ މަސައްކަތަކަށް ބަދަލު ނާންނާނެކަމަށްވެއެވެ.
މި ބޭފުޅުންނަށް މަގާމުގެ ހުވާލައިދެއްވީ، ދިވެހިރާއްޖޭގެ ހައިކޯޓުގެ ފަނޑިޔާރު އައްޝައިޚު ޢަލީ ޙަމީދު މުޙަންމަދު ކަމަށް ރައީސް އޮފީހުގެ ވެބްސައިޓުގައި ބަޔާން ކުރައްވާފައިވެއެވެ.
މި 9 ބޭފުޅުންނަށް އާ މަގާމުތަކެއް މިހަމަޖެއްސެވީ 2 މެއި 2008 ގައި ދިވެހި ސިވިލްސާވިސް ޤާނޫނަށް އަމަލުކުރަން ފަށާއިރު، މި 9 ބޭފުޅުންވެސް ސިވިލް ސާވިސް ކޮމިޝަނުގެ އިޚްތިޞާޞްގެ ދަށުން ސަލާމަތްކުރުމަށް ހެދި އެދިފަހަރެއްގެ ގޮތުގައި ކަމަށް ވެއެވެ. ނަމަވެސް ސިވިލް ސާވިސް ޤަނޫނުގެ 3 ވަނަ މާއްދާބުނަނީ "ތިރީގައި ބަޔާންކުރެވިފައިވާ ފަރާތްތައް ދިވެހި ސިވިލް ސަރވިސްއަކު ނުހިމެނެއެވެ. (ހ) ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 42 ވަނަ މާއްދާގެ (ހ) ގެ ދަށުން ރައީސުލްޖުމްހޫރިއްޔާ އިސްކޮށް، ވަކިކުރާ ފަރާތްތައް. (ށ) ވަޒީރުންގެ ނާއިބުން. (ނ) ރައީސުލްޖުމްހޫރިއްޔާގެ އެގްޒެކެޓިވް ސެކްރެޓަރީ. (ރ) ދިވެހި ސިފައިން. (ބ) ދައުލަތުގެ ވިޔަފާރި ތަންތަނުގައި ވަޒީފާ އަދާކުރާ މުވައްޒަފުން. (ޅ) އެހެން ޤާނޫނަކުން ސިވިލް ސަރވިސްގައި ނުހިމެނޭ ފަރާތްތައްކަމުގައި ކަނޑައަޅާ ފަރާތްތައް" މިހެނެވެ.
ޤާނޫނުއަސާސީގެ 42 ވަނަ މާއްދާގެ (ހ) ގެ ދަށުން ރައީސުލްޖުމްހޫރިއްޔާ އިސްކޮށް، ވަކިކުރާ ފަރާތްތަކަކީ "ރައީސުލްޖުމްހޫރިއްޔާގެ ނާއިބާއި، އުއްތަމަފަނޑިޔާރާއި، ރައްޔިތުންގެ މަޖިލީހުގެ ރައީސާއި، އެ މަޖިލީހުގެ ނާއިބުރައީސާއި، ވަޒީރުންނާއި، ބަންޑާރަނާއިބާއި، ޚާއްޞަ އިމްތިޔާޒުތަކާއެކު ދިވެހި ދައުލަތުން ބޭރުފަރާތްތަކަށް ފޮނުވާ މީހުންނާއި، އަތޮޅުވެރިންނާއި، ފަނޑިޔާރުންނާއި، އޮޑިޓަރ ޖެނެރަލާއި، ކޮމިޝަނަރ އޮފް އިލެކްޝަންސް" ކަމަށް ގާނޫނު އަސާސީގައިވެއެވެ.
ގާނޫނު އަސާސީގައިވެސް އަދި ސިވިލް ސާވިސް ގާނޫނުގައިވެސް "ސީނިއަރ މިނިސްޓަރުން" އަދި "ދައުލަތުގެ މިނިސްޓަރުން" ބަޔާންކޮށްފައެއް ނެތެވެ.