އިސްމާއިލް
މިއަދު ދަރުބާރު ގޭގައި އެމްޑީޕީގެ ތަމްހީދީ އިންތިހާބާ ބެހޭ ކޮމެޓިން ބޭއްވި ނޫސް ކޮންފަރަންސެއްގައި މިނިވަނުން ކުރި ސުވާލަށް ޖަވާބު ދެއްވަމުން އެކޮމެޓީގެ މުގައްރިރު މުހައްމަދު ރަޝީދު (ބިގޭ) ވިދާޅުވީ މިމަހު 25 ގައި އެމްޑީޕީން ބާއްވާ އެޕާޓީގެ ތަމްހީދީ އިންތިހާބާއި، ޗެއަރޕާސަންގެ އިންތިހާބު އެއީ ގޮންޖަހާ ނުލެވޭވަރުގެ ނަމޫނާ އިންތިހާބަކަށް ހައްދަވާނެކަމަށެވެ. ދިވެހި ސަރުކާރުން އެތައް މިލިއަން ރުފިޔާއެއް ހަރަދުކޮށްގެން ބާއްވާ ގައުމީ އިންތިހާބުތަކަށް ވުރެ ފެންވަރު ރަނގަޅު އެތެރެ ފެންނަ އިންތިހާބެއް 4 ލައްކަ ރުފިޔާ ހަރަދުކޮށްގެންވެސް ބޭއްވިދާނެ ކަން އެންޑީޕީން މިމަހު ބާއްވާ އިންތިހާބުން ސާބިތު ކޮށްދޭނެ ކަމަށް މުގައްރިރު ވިދާޅުވިއެވެ.
"އަޅުގަނޑުމެންގެ ނެޝަނަލް އެގްޒެކްޓިވް ކޮމެޓީން ނިންމާފަ އޮތީ މިއިންތިހާބަށް ހަރަދު ކުރެވޭނީ 4 ލައްކަ ރުފިޔާ ކަމަށް. އެބަޖެޓަށް ފައްތައިގެން މިއިންތިހާބަކީ ގޮންޖަހާ ނުލެވޭވަރުގެ ނަމޫނާ އިންތިހާބަކަށް ހަދާނަން، ދިވެހިރާއްޖޭގައި މިބޭއްވޭ ނެޝަނަލް އިލެކްޝަންތަކުގައި އެތައް މިލިއަން ރުފިޔާއެއް ހަރަދު ކުރައްވައިގެން މިބާއްވާ އިންތިހާބު، މިހާ ޓްރާންސްޕޭރަންޓްކޮށް 4 ލައްކަ ރުފިޔާއިން ކުރެވިދާނެ ކަމެއްކަން އަޅުގަނޑުމެން ސާބިތު ކޮށްދޭނަން" މުހައްމަދު ރަޝީދު ވިދާޅުވިއެވެ.
މިއަދުގެ ނޫސްކޮންފަރެންސްގައި ނޫސްވެރިން އެންމެ މުހިންމު ކަމަކަށް ނެންގެވީ އެމްޑީޕީގެ މިއިންތިހާބުގައި ޕްރޮކްސީ ނުވަތަ ވޯޓްލާން ދިއުމަށް އުޒުރުވެރިވާ މެމްބަރުންގެ ބަދަލުގައި އެހެން މެމްބަރަކު ފޮނުވުމާމެދު އެމްޑީޕީގެ ރައީސް ޑރ މުހައްމަދު މުނައްވަރާއި އަދިވެސް އެހެން ބައެއް މެމްބަރުން ދެކޮޅުހައްދަވާ މައްސަލައެވެ.
މުހައްމދު ރަޝީދު ވިދާޅުވީ ޕްރޮކްސީއާއި ދޭތެރޭ އެއްވެސް ކެނޑިޑޭޓަކަށް އިންކާރު ކުރުމުގެ ޖާގައެއް ނެތްކަމަށާއި، އެކެންޑިޑޭޓުންވެސް ހިމެނޭ އެމްޑީޕީގެ ކޮންގްރެސްއިން ނިންމާފައިވާ އަސާސީ ގަވާއިދުގައި މެމްބަރުންނަށް ޕްރޮކްސީ ވޯޓްލުމުގެ ހައްގު ލިބިދޭކަމަށެވެ. އަދި އެހެން ވުމުން މެމްބަރުންނަށް ޕްރޮކްސީ ހުށަހެޅުމަށް ހުޅުވާލުމުން މިހާތަނަށް ޖުމްލަ 238 ޕްރޮކްސީ ވޯޓް ރަޖިސްޓްރީ ކޮށްފައިވާކަމަށްވެސް މުހައްމަދު ރަޝީދު ވިދާޅުވިއެވެ.
ޕްރޮކްސީއާ ބެހޭގޮތުން ވާހަކަ ދައްކަވަމުން އިންތިޚާބު ކޮމިޓީގެ މެންބަރު ޑރ އިބްރާހިމް ޑީޑީވެސް ވިދާޅުވީ ޕްރޮކްސީއަކީ އެޕާޓީގެ އަސާސީ ގަވާއިދުގައި ޕާޓީގެ މެމްބަރުންނަށް ލިބިދޭ ހައްގެއް ކަމަށެވެ. އަދި އެމްޑީޕީއަކީ ޑިމޮކްރަޓިކް ޕާޓީއެއް ކަމަށާއި، އެޕާޓީގެ ކިތަންމެ އިސްމަގާމެއްގައި ހުންނަވާ ބޭފުޅަކު ބޭނުންވި ނަމަވެސް އެމްޑީޕީގެ އަސާސީ ގަވާއިދުގައި ނިންމާފައިވާ އެއްވެސް ކަމަކާއި ހިލާފަށް އެއްވެސް ކަމެއް ނުކުރެވޭނެ ކަމަށްވެސް ޑރ ޑީޑީ ވިދާޅުވިއެވެ.
މިއަދު އޮތް ނޫސްކޮންފަރެންސްގައި ވޯޓް ލެވޭނެ މީހުންގެ ލިސްޓްގައި މަރުވެފައި ތިބި މީހުން ހިމެނޭތޯ ނޫސްވެރިއަކު ދެންނެވުމުން އެކަމާ އެއްބަސް ވެވަޑައިގަނެ އިންތިހާބާއި ބެހޭ ކޮމެޓީގެ މެމްބަރު ޑރ ޑީޑީ ވިދާޅުވީ ޕާޓީތަކުގައި ހިމެނޭ މީހުންގެ ލިސްޓް ސައްހަ ކުރުމަކީ ސިޔާސީ ޕާޓީގެ ދަފްތަރު ބަލަހައްޓަވާ ބައެއްގެ ޒިންމާއެއްކަމަށާއި، އެލިސްޓްގައި މަރުވެފައިވާ މީހުން ތިބި ނަމަވެސް އޭގެ ނާޖާއިޒް ފައިދާއެއް އެއްވެސް މިހަކަށް ނުނެގޭނެ ކަމަށެވެ. ސަބަބެއް ކަމަށް ޑރ ޑީޑީ ވިދާޅުވީ ވޯޓްލާ މީހާ ވޯޓްލާން ހާޒިރު ވާއިރު އޭނާގެ ފޮޓޯ ޖެހި ލިޔުމެއް ގެންނަން ޖެހޭ ގޮތަށް ހަމަޖައްސާފައި ވާނެ ކަމަށާއި، އަދި ވޯޓްލާ ނިމުމުން ވޯޓްލީމީހުންގެ ލިސްޓް އާއްމު ކުރެވޭނެކަމަށެވެ.
އެމްޑީޕީން މައުލޫމާތު ދެއްވާ ގޮތުގައި މިމަހު 25ގައި އެޕާޓިން ބާއްވާ ތަމްހީދީ އިންތިހާބުގައި ވޯޓުލުމުގެ ހައްގުލިބިފައިވާ 20958 މެމްބަރުންގެ އެބަތިއްބެވެ. އަދި މިއިންތިޚާބުގައި ޖުމްލަ 117 ވޯޓުފޮށި ތަފާތު 90 ރަށުގައި ބެހެއްޓެނެ ކަމަށާއި، އޭގެ ތެރޭގައި 6 ރިޒޯޓާއި، 3 ސިނާއީ ރަށާއި، އާބާދުވެފައިވާ 80 ރަށާއި މާލެ ހިމެނޭ ކަމަށް އެމްޑީޕީގެ އިންތިހާބު ކޮމެޓީން މައުލޫމާތު ދެއްވައެވެ. އަދި ސ. ހިތަދޫގައި 2 ފޮށިހުންނައިރު މާލޭގައި 27 ފޮށި ބެހެއްޓޭނެއެވެ. މޭލެގެ ފޮށިތަކުގެ ތެރެއިން ވިލިނގިއްޔާއި ހުޅުމާލޭގެ ފޮށިތައްނޫން އެހެން ހުރިހާ ފޮއްޓެއް ބަހައްޓާފައި ހުންނާނީ ކަލާފާނު ސްކޫލްގައެވެ. މާލޭގައި ހުންނަ 27 ފޮށީގެތެރެއިން 20 ފޮއްޓަކީ މާލޭގައި ދިރިއުޅޭ 20 އަތޮޅު / ދާއިރާގެ މެމްބަރުން ވޯޓުލާން މާލޭގައި ބަހައްޓާ ފޮއްށިކަމަށާއި، 4 އަވަށުގެ މެމްބަރުންނަށް ކޮންމެ އަވަށަކަށް އެއްފޮއްޓާއި، މާލޭދަފްތަރުގައި ހިމެނޭ މެމްބަރުންނަށް އެއްފޮށި ބަހައްޓާފައި ހުންނާނެކަމަށްވެސް އެމްޑީޕީން މައުލޫމާތު ދެއްވައެވެ.