ބ.ތުޅާދޫގެ ސްކޫލް ކުދިންގެ ތެރޭގައި ހުރިތަނަށް ކުއްލިއަކަށް ވެއްޓި ހަށިގަޑަށް ވާންއަރައި ގޮތްތަކެއް ވާތީ ސްކޫލަށް ނުދެވޭ ގާތްގަޑަކަށް 10 ކުދިން އެބަ ތިބިކަމަށް އެރަށު ބައެއް ރައްޔިތުން ބުނެފިއެވެ. އެމީހުން ބުނިގޮތުގައި ސްކޫލަށްދާ ބައެއްކުދިންނަށް މިގޮތްތަކެއް ވަމުން އަންނަތާ މިހާރު ދެތިން އަހަރު ވެއްޖެއެވެ. އަދި ކުދިންނަށް މި ގޮތްތައް ވާން ފެށުމުން ހަށިގަޑުގެ މެދު އިދިފުށަށް ލެބިގެން ގޮސް އަތްފަޔަށް ވާގި އަރައި ބައެއް ފަހަރު ދެގަޑިއެއްހާއިރުވެސް އެގޮތުގައި އޮވެއެވެ.
މިނިވަނުގެ ރިޕޯޓަރެއް ބ ތުޅާދޫއަށް ކުރި ޒިޔާރަތެއްގައި އުމުރުން 16 އަހަރުގެ އަންހެން ކުއްޖަކަށް އެގޮތްތައް ވެފައިވަނިކޮށް ފެނިފައިވެއެވެ. އެއިރު 7 މީހުންވެގެން އެދެއްގެ މަތީގައި އޭނާ ބާއްވައި އޭނާއަށް ގެއްލުމެއް ނުވާގޮތަށް ހިފެހެއްޓޭތޯ ބަލަމުން ގެންދިޔައެވެ.
އުމުރުން 16 އަހަރުގެ ސްކޫލު ކުއްޖެއްގެ މައިންބަފައިން މައުލޫމާތު ދިންގޮތުގައި އެމީހުންގެ ދަރިފުޅު މިއަހަރު ޖެނުއަރީ 21 ވަނަ ދުވަހުން ފެށިގެން މިއަދާ ހަމައަށް އެވްރެޖުކޮށް ދުވާލަކު 3 ފަހަރު ވެއްޓި އެގޮތްތައް ވަމުން ދެއެވެ.
"ސްކޫލުގައި އިންދާ ނޭވާ ހާސްވާންފެށީ ވަރަށް ބޮޑަށް. ދެން ވާގޮތެއް ނޭގޭ. އެއީ ފުރަތަމަ.. އަށެއްގައި ނޭވާ އެންމެ ބޮޑަށް ހާސްވާން ފެށީ... ދެވަނަ އަހަރު ނުވައެއްގައި ބަޑުގައި ރިއްސަން ފެށީ... އޭގެ ފަހުން ދެން މިކަންތައް ލައިގަންނަން ފެށީ." 16 އަހަރުގެ ކުއްޖާ ކިޔައިދިނެވެ. "އެދުވަހު ނޭވާ ހާސްވެފައި ބަޑުގައިވެސް ރިއްސާފައި، އަތްފައި ފިނިވެފައި ދެން ނުވާކަށް ގޮތެއް ނެތް، ބޮލުގައި ރިއްސާފައި. އެހެންޏާ ދިމާ ނުވާކަހަލަ ގޮތްތަކެއް ދިމާވާން ފެށީ. ދެން އެއަށް ފަހު ވާގޮތެއް ނޭގޭ"
އޭނާ ބުނާގޮތުގައި ރަށުގެ ހެލްތު ސެންޓަރުގެ ޑޮކްޓަރަކަށް ދެއްކުމުން ބުނީ އޭނާގެ އެއްވެސް މައްސަލައެއް ނެތްކަމަށެވެ. އަދި މާލެއައިސް ޑޮކްޓަރަށް ދެއްކިފައިވީނަމަވެސް އެކަން އޭނާއަށް ދިމާވާ ސަބަބެއް އޮޅުން ފިލާފައެއް ނުވެއެވެ.
"ބަޑުގައި ރިއްސާތީ ދެއްކީ. ޓެސްޓު ތަކެއްވެސް ހެދިން. އެއްވެސްކަމެއް ނެތޯ ބުނީ." އޭނާ ބުންޏެވެ. "ނަމަވެސް އެހެން ވާން އުޅޭއިރު ވަރަށް ބޮޑަށް ރިއްސާ."
ސްކޫލްގެ ޕްރިންސިޕަލް މރ ދޭވަދާސަން މައުލޫމާތު ދިންގޮތުގައި މިއަހަރު މައްސަލަ ޖެހިފައިވަނީ ގްރޭޑް 10 ގެ 5 ކުއްޖަކަށާއި ގްރޭޑް 5 ގެ 2 ކުދިންނަށެވެ. އަދި ފަންޑިތަވެރިއެއްގެ ފަރުވާ ލިބި ރަގަޅުވެގެން މިހާރު އެއް ކުއްޖަކު ސްކޫލަށް ދާން ފަށައިފިއެވެ.
މރ ދޭވަދާސަން މައުލޫމާތު ދިންގޮތުގައި އައިޖީއެމްއެޗްގެ ސައިކިއޭޓްރިސްޓެއް ސްކޫލަށް ގޮސް އެކުދިން ބެލުމަށްފަހު އެކުދިންނަށް ދިމާވެފައިވަނީ ނަފްސާނީ މައްސަލައެއްކަމަށް ބުނެފައިވެއެވެ. ނަމަވެސް ރަށު ރައްޔިތުން ގަބޫލުކުރާގޮތުގައި ކުދިންނަށް ދިމާވެފައިވަނީ ޖިންނީގެ އުދަގޫކަމަށް އޭނާ ބުންޏެވެ.
ކުއްޖާ ކިޔައިދިން ގޮތުގައި ކުދިންނަށް ދިމާވާ މި މައްސަލައާ ދޭތެރޭ ސްކޫލުގެ ޓީޗަރުން ދެކެނީ އެއީ އެކުދިން ނުކިޔަވަން މެދުވެރިކުރާ އުޒުރެއް ކަމުގައެވެ.
"ޓީޗަރަކު ބުނަނީ މިވީހާ ދުވަހުވެސް އަހަރުމެންވެސް މިއުޅެނީ މި ސްކޫލުގައި ނޫންހެއްޔޯ. ދެން އެމީހުންނަށް ނުވާ ގޮތްތަކެއް ކީއްވެގެން ހެއްޔޯ އަޅުގަޑަށް ދެން ވާންވީ." އޭނާ ކިޔައިދިނެވެ. "ދެން ބުނަނީ ނުވާންވާ ގޮތްތަކެއް ވާތީ އޯ މިބުނަން ޖެހެނީ. ވަރަށް ދުވަސް ވެއްޖެއޯ ޓީޗަރުންވެސް އެތާ އުޅެނީ އެކަމަކު އެމީހުންނަކަށް އެކަހަލަ ކަމެއް ދިމައެއް ނުވެޔޯ. ދެން ބުނަނީ ރަގަޅަށް ނުކާތިއްޔޯ. އަމިއްލަ އަށޯ ރަގަޅުވެވޭނީ މިކަހަލަ ކަންތައްވެސް."
ކުއްޖާ ސްކޫލުގައި ކިޔަވަމުން ދަނިކޮށް ހުރަސް އެޅިފައިވާތީ އޭނާގެ މައިންބަފައިންގެ ކަންބޮޑުވުން މިހާރުވަނީ ވަރަށް ބޮޑަށް އިތުރުވެފައިވެއެވެ.
"ސްކޫލުގައި ކިޔަވަކިޔަވާ ހުރި ކުއްޖެއް. މިހާރު ސްކޫލަށްވެސް ނުދެވޭ. އޭނާގެ ކިޔެވުން މިހާރު މިއޮތީ ހުއްޓިފައި." ކުއްޖާގެ މަންމަ ބުންޏެވެ.
ކުއްޖާގެ ބައްޕަ ބުނާ ގޮތުގައި ކުއްޖާއަށް ފަރުވާ ލިބި ރަގަޅުވުމުން ނޫނީ ސްކޫލަށް ނުފޮނުވުމަށް އެޑިޔުކޭޝަން މިނިސްޓްރީން ސްކޫލަށް އަންގައިގެން އެކަން ތުޅާދޫ ސްކޫލުން މިހާރު ވަނީ އޭނާއަށް އަންގަވާފައެވެ.
"އެޑިޔުކޭޝަނުގައި ތިބީ ކޮހުންކަމަށް ލަފާކުރެވެނީ. އެމީހުން ފޮނުވާފައި އޮތީ ފެކްސްއެއް. އަހަރުމެންގެ ދަރި ބަލިކަމުން ސްކޫލަށް ނުފޮނުވާގޮތަށް... އެމީހުން އޮންނަނީ ބުނެފަ ފަރުވާކޮށްގެން ނޫންނަމަ ޑޮކްޓަރަށް ދައްކައިގެން ބަރާބަރަށް ރަގަޅުވީމަ އޭ ފޮނުވަން ޖެހޭނީ. ގެރެންޓީ އޮންނަންޖެހޭނެއޭ. މިހާރު އެޑިޔުކޭޝަނުގައި ތިބޭ މީހުންނަށް އެގޭބާ އެމީހުންނަށް އެޑިޔުކޭޝަނުގައި ތިބެފައި ގެއަށް ދެވޭނެކަން. ގެރެންޓީ އޮވޭބާ އެމީހުންނަށް." ކުއްޖާގެ ބައްޕަ ބުންޏެވެ.
ތުޅާދޫގައި އެހެން ކުއްޖެއްގެ ބައްޕަ މައުލޫމާތު ދިންގޮތުގައި އޭނާގެ ދަރިފުޅު ގްރޭޑް 6 ގައި ކިޔަވަމުން ދަނިކޮށް 2004 ވަނަ އަހަރުން ފެށިގެން އަންނަނީ ހުރިތަނަށް ވެއްޓި ގޮތްތަކެއް ވަމުންނެވެ.
"ފަސް ހަތަރު މީހުންނަކަށް ނުހިފެހެއްޓޭ އެހެން ވެގެން ދާއިރުގައެއް." ކުއްޖާގެ ބައްޕަ މައުލޫމާތު ދިނެވެ. "ރޭގަޑު ހައެކުން ފެށިގެންގޮސް އެރޭގެ ދިހަގަޑިބައިވަންދެން އެފަދަ ހާލެއްގައި އަހަރުމެން އެބަ ތެޅެންޖެހޭ. ވަރު އަރުވަން ފަށައިފިއްޔާ އަހަރުމެން ތިބެނީ އަތްމައްޗަށް ނަގައިގެން... ދުވާލަކު 3 ފަހަރުވެސް ވޭ އެހެން... ޑޮކްޓަރު ބުނީ މާބޮޑު ކަމެއް ނެތޭ. އޭނާ ކިޔެވުމުގެ އުއްމީދު އެބައޮތޭ. އޭނާ ކިޔަވާހިތްނުވަނިއްޔޭ. އެއީ އެމީހުން ބުނާ އެއްޗަކީ. އެކަމަކު ބޭސް ދިން 6 މަސްދުވަހުގެ ބޭސް... އަނެއްހެން ބަލަންޏާ ހުރީވެސް ފިޓު ޖެހޭ ބޭސް ދީފައި. އެއްމަހާ 15 ދުވަސްވެސް ނުވާނެ އަދި ޑޮކްޓަރަށް ދެއްކިފަހުން."
އޭނާ ބުނިގޮތުގައި އޭނާގެ ދަރިފުޅަކީ ގްރޭޑް 7 އާ ހަމައަށް އައިއިރުވެސް އޭ ރިޕޯޓު ލިބޭ ކުއްޖެކެވެ.
ނަމަވެސް ވ ފުލިދޫގެ ފަންޑިތަ ވެރިއެއް ގާތުން ފަރުވާ ހޯދުމަށްފަހު މިވީ 2 ހަފުތާގައި އޭނާގެ ދަރިފުޅަށް އަދި އެފަދަ ކަމެއް ދިމަލެއް ނުވެއެވެ.
އޭނާ ބުނިގޮތުގައި މާލެއާއި ރާއްޖެއިން ބޭރުން އޭނާގެ ދަރިފުޅަށް ފަރުވާ ހޯދައި ނަފްސާނީ ޑަކްޓަރުންނަށްވެސް ވާނީ ކުއްޖާ ދައްކާފައެވެ. އަދި އެކަމަށް 10،000 ވުރެ އިތުރަށް އޭނާ މިހާރު ފައިސާ ޚަރަދުކޮށްފައިވާއިރު އެޑިޔުކޭޝަން މިނިސްޓްރީން އެއްވެސް އެހީއެއް އޭނާގެ ދަރިފުޅަށް ލިބިފައެއް ނެތެވެ.
އެޑިޔުކޭޝަނަށް ގޮސް ޒާހިޔާއާ ބައްދަލުކޮށްދިނުމަށް އެދުނިން. އެކަމަކު ނުކޮށްދިން." އޭނާ ބުންޏެވެ.
އެރަށުގެ އުމުރުން ދުވަސްވެފައިވާ މީހަކު ބުނިގޮތުގައި އެރަށުގެ ކުދިންނަށް މި މައްސަލަ އެންމެ ފުރަތަމަ ދިމާވަނީ ސްކޫލުންނެވެ. އޭނާ ބުނިގޮތުގައި އެ ސްކޫލް އަޅާފައިވަނީ ރައީސް މައުމޫނު ވެރިކަމަށް އިސްވިތަނުންނެވެ. ގަބުރުސްތާނެއް ގޮތުގައި އެރަށުގައި ބޭނުންކުރެވެމުން އައި އެ ބިމަކީ ސްކޫލް އެޅުމުގެ ކުރިން ބޯޅަދަޑެކެވެ.
