ސަރުކާރުން ދ. ހުޅުދެލީގައި ހަދަމުން ގެންދާ ބަދަރަކީ އެރަށު މީހުންނަށް ނުފުދޭތަނެއް ކަމަށާއި އެއީ މިއަހަރު ކެންޕޭނު ދަތުރުތަކުގައި އެރަށަށް އަންނަ މީހުންގެ ފަސޭހައަށް ހަދައިދޭ ތަނެއްކަމަށް އެރަށު މީހުން ބުނެފިއެވެ. ބޮޑުކަންނެއްޔަށްދާ 80 ފޫޓުގެ 9 ދޯންޏާއި މަހަށްދާ ކުދި ސައިޒުގެ ގާތްގަޑަކަށް 5 ދޯނި އެޅުމަށް އެރަށުގައި ހަދައިދެނީ 300 ފޫޓު 200 ސަރަހައްދެއްކަމަށް އެރަށު މީހުން ބުނެއެވެ. އަދި މިކަމުގެ ސަބަބުން ކުރިމަގުގައި އޮޑިވެރިންގެ މެދުގައި ދެކޮޅުވެރިކަން އުފެދިދާނެކަމަށްވެސް އެމީހުން ބުނެއެވެ.
"އަހަރުމެން ގަބޫލެއް ނުކުރަން ލަފާފުރުމުގެ (ދަތިތަކަށް) ހައްލެއް ކަމަށް. އެއީ ހަމައެކަނި ސަރުކާރުގެ ޓީމުތައް ކެންޕޭނަށް އެމީހުންގެ ލޯންޗު ގާތްކޮށްލާ ތަންކޮޅެއްކަމަށް އަޅުގަޑުމެން ގަބޫލު ކުރަނީ" މަސްވެރިކަން ކުރާތާ ގާތްގަޑަކަށް 22 އަހަރުވެފައިވާ މުހަންމަދު ރަޝާދު ބުންޏެވެ. "އެއީ މިރަށުގެ ދޯނިފަހަރުތައް އެތާ ނޭޅޭނެތީ. އެހެންވީމާ އެއީ ކޮންމެހެން ދޯނިފަހަރު ނޭޅޭވަރުގެ ތަންކޮޅެއްގައި އެއީ ލަފާފުރުމުގެ ހައްލެއް ކަމަށް އަޅުގަޑު ނުދެކެމޭ. އޭގެ ހަތަރުދޯނި ފަސްދޯނިވެސް އެއްފަހަރާ ވަދެ ނުނިކުމެވޭ. އެހެންވީމާ އެއްވެސް ހާލެއްގައި އަޅުގަޑުމެން ނުދެކެން އެއީ ލަފާފުރުމުގެ ހައްލެއް ކަމަކަށް."
މުހަންމަދު ރަޝާދު ބުނީ އެރަށުގެ އުތުރު ފަރާތު ބަދަރު ހެދުމުގެ މަސައްކަތް ފެށިތާ ގާތްގަޑަކަށް 6 މަސްދުވަސް ވެއްޖެއެވެ. އަދި ބަދަރު ސަރަހައްދު ކޮނެފައި އޮންނަތާވެސް ދުވަސްތަކެއް ވެފައިވާތީ މިހާރު އެ ބަދަރު ތިލަވެފައިވާނަމަ އެކަން އެގޭނީ ބަދަރު ނިމި ރަށާ ހަވާލުވުމުންކަމަށާއި އެރަށުގެ ދެކުނު ފަރާތުގައި ބަދަރުގެ ގޮތުގައި ބޭނުންކުރެވެމުން އައި ސަރަހައްދު ބިންދޫކުރުމަށް ނިންމިފައިވާކަމަށް އޭނާ މައުލޫމާތު ދިނެވެ.
ރަށުގައި އަލަށް ހެދެމުންދާ ބަދަރުގެ ސަބަބުން ނުކުމެދާނެ ނަތީޖާއާ މެދު ވާހަކަ ދައްކަމުން އެރަށުގައި މަސްވެރިކަން ކުރާތާ ސާޅީހަކަށް އަހަރުވެފައިވާ އަބްދުލްހަމީދު ހަސަން ބުނީ ސަރުކާރުން ހައްދަވައިދެއްވާ ބަދަރަކީ އޭނާއަށް ވިސްނޭގޮތުގައި އެ ރަށު މީހުންގެ މެދުގައި އަރައިރުން އުފެދި ހަމަޖެހުން ގެއްލިގެން ދާނެ ކަމަކެވެ.
"ރަށުގައި ހުޅުފަޅައިގަންނަވަރުގެ ކަމެއް މީ. އެއީ ދެދޯނި ދެދޯނި ދޯނި އައިސް ގާކޮޅުން ނެއްޓި އަޅާފައި އޮންނަނީ މިތަންކޮޅު. އަޅާފައި ދެދޯނި ދެދޯނި ޖެހޭނީ. ދެން އަރާރުން ފަށާނީ އޮޑިވެރިން. ދެން ނުކުންނާނީ ދެފަރާތުގެ އާއިލާ. ހުރިހާ އޮޑިވެރިންވެސް އެކަމާ އެއްބަސްވާނެ ދޯނި އަޅާނެ ޖާގައެއް ނެތް. ދޯނި އަބުރާލެވޭނެ ޖާގަވެސް އެތާކު އަޅާފަ ނެތް." އަބްދުލްހަމީދު ވިދާޅުވިއެވެ. "މީ އަޅުގަޑުމެންނަށް ސަރުކާރުން ކޮނެދެއްވާފައިވާ މަޑިވަޅެއްހޭ ނުވަތަ ބަދަރެއްހޭ."
16 މިލިއަން ރުފިޔާގެ މަޝްރޫއެއްގެ ދަށުން ހުޅުދެލީ ބަނދަރު އެމްޓީސީސީން ހަދަންފެށީ އޮކްޓޯބަރު 2007 ގައެވެ. ކޮންސްޓްރަކްޝަން މިނިސްޓްރީން މައުލޫމާތުދޭ ގޮތުގައި ހުޅުދެލީ ބަދަރުގެ 90% މިހާރުވަނީ ނިމިފައެވެ. ހުޅުދެއްޔަކީ 26 ޑިސެމްބަރ 2004 ގެ ސުނާމީގެ ސަބަބުން ބޮޑެތި ގެއްލުންތަކެއް ލިބިފައިވާ ރަށެކެވެ.
No comments:
Post a Comment