ޖަޕާނަށް ފެތުނު ވީއޭ ކުންފުނީގެ ބޯޓުގެ އިންޝިއުރަންސް މައްސަލަ

ގެއްލުންތަކުގެ ބާވަތަށާއި އަދަދުތަކަށް ބަދަލު ގެނެސްފައިވާ ކަމަށް އިންޝިއުރެންސް ކުންފުނިން ބުނެފި

 

ޖަޕާނަށް އައި ތޫފާނެއްގައި އެގައުމުގެ ސައިކީގެ ބަނދަރުގައި އަޅާފައިއޮތް ވީއޭ ޕްރައިވެޓް ލިމިޓެޑްގެ "އުފުލި"ބޯޓު 2006 ވަނަ އަހަރު ސެޕްޓެމްބަރުގެ 17 ވަނަ ދުވަހު އަޑިއަށް ދިޔަ މައްސަލާގައި ވީއޭ ކުންފުނިން ސްރީލަންކާ އިންޝިއުރެންސް ކޯޕަރޭޝަން ލިމިޓެޑުން އިންޝުއަރަންސް ހޯދުމަށް ކުރާ ދައުވާގައި ގެއްލުންތަކުގެ ބާވަތަށާއި ގެއްލުމުގެ އަދަދުތަކަށް ބަދަލު ގެނެސްފައިވާ ކަމަށް ސްރީލަންކާގެ އިންޝިއުރެންސް ކުންފުނިން ބުނެފިއެވެ.

ބޯޓުއަޑިއަށް ދިޔަ މައްސަލާގައި ވީއޭ ޕްރައިވެޓް ލިމިޓެޑްގެ ފަރާތުން ސްރީލަންކާ އިންސިއުރެންޝް ކޯޕަރޭޝަންގެ މައްޗަށް ކުރާ ދައުވާއާ ގުޅިގެން އަންގާރަ ދުވަހު ބޭއްވި ޝަރީއަތުގެ މަޖިލީހުގައި ސްރީލަންކާގެ އިންޝިއުރެންސް ކުންފުނީގެ ވަކީލު ވިދާޅުވީ ވީއޭ ޕްރައިވެޓް ލިމިޓެޑްގެ ފަރާތުން މިމައްސަލާގައި ހުށަހެޅުއްވި ހިސާބުތަކަށް ބަލާއިރުގައި އެކުންފުނި ނޫން އެހެން ކުންފުންޏެއްގެ ފައިސާގެ ހިސާބުތަކެއްވެސް ހުށަހަޅުއްވާފައިވާ ކަމަށެވެ. އެގޮތުން ދޮޅިޔަދޫ އިންވެސްމަންޓުގެ ނަމުގައި ޖަޕާނުގެ ލޮޖިސްޓިކް ކުންފުންޏަކަށް ފޮނުވާފައިވާ ޓެލެގްރެފިކް ޓްރާންސްފާ ތަކެއް މިހިސާބުތަކުގެ ތެރޭގައި ހިމަނާފައިވާ ކަމަށެވެ. އަދި ފެތުނު "އެމް.ވީ އޯޝަން ރޫލާ"ގެ ފަޅުވެރިންގެ މުސާރައާ ގުޅޭގޮތުންވެސް ތަފާތު އަދަދުތަކެއް ހިމަނާފައިވާ ކަމަށް ސްރީލަންކާ އިންޝިއުރެންސް ކުންފުނިން ބުނެފައިވެއެވެ. ނަމަވެސް ސްރީލަންކާގެ އިންޝިއުރެންސް ކުންފުނިން މިހިސާބުތަކުގެ ތަފްސީލު ލިޔެކިޔުމުން ޝަރީއަތުގެ މަޖިލީހަށް ހުށަހަޅާފައެއް ނުވެއެވެ.

ގާޒީ ވިދާޅުވީ ގެއްލުންތަކުގެ ބާވަތަށާއި އަދަދުތަކުގައި ހުރި ތަފާތުތައް ލިޔެކިޔުމުން ހުށަނާޅުއްވާ ކަމުގައިވާނަމަ އެކަންތައްތައް ޝަރީއަތުން ބަލައިނުދެވޭނެ ކަމަށެވެ. އަދި ޝަރީއަތުން އަމިއްލައަށް ކަންތައްތައް ދިރާސާ ނުކުރައްވާނެ ކަމަށާއި ޝަރީއަތުން ބަލައި ދެވޭނީ ދައުވާ ލިބޭ ފަރާތުން ދިރާސާ ކުރެއްވުމަށްފަހު ހުށަހަޅުއްވާ ކަންތައްތައް ކަމަށެވެ.

މިކަމާ ގުޅިގެން ސްރީލަންކާ އިންޝުއަރެންސް ކުންފުނީގެ ވަކީލު ވިދާޅުވީ ބަޔާނެއްގެ ސިފާގައި ލިޔެކިޔުމުންވެސް އެކަންތައްތައް ހުށަހެޅިދާނެ ކަމަށެވެ. ޝަރީއަތުންވަނީ އެފުރުސަތު އިންޝިއުރެންސް ކުންފުންޏަށް ދީފައެވެ.

ބޯޓުއަޑިއަށް ދިޔަ މައްސަލާގައި ވީއޭ ޕްރައިވެޓް ލިމިޓެޑްގެ ފަރާތުން ސްރީލަންކާ އިންސިއުރެންޝް ކޯޕަރޭޝަން ލިމިޓެޓްއިން އެދެނީ 889،000 (އަށްލައްކަ އަށްޑިހަ ނުވާހާސް) ޔޫއެސް ޑޮލަރުގެ ބަދަލެއް ދިނުމަށެވެ.

2006 ވަނަ އަހަރު ޖަޕާނަށް "ޝަންޝަމް" ނަން ދީފައިވާ ތޫފާނުގައި ސައިކީގެ ބަނދަރުގައި އަޅާފައިވަނިކޮށް ބަންޑުން ޖަހާލި އުފުލީގައި ފަސް ދިވެހިންހެން ތިއްބެވެ. އަދި މި ފަސްމީހުންގެ ތެރެއިން ގދ ތިނަދޫ ޕްލެނެޓް އުމުރުން 49 އަހަރުގެ ހުސައިން މަޖުދީ އެ ހާދިސާގައި ވަނީ މަރުވެފައެވެ. އަދި މަރުވި ހުސައިން މަޖުދީގެ ހަށިގަނޑު ޖަޕާނުގައި އަންދާލާފައިވެއެވެ. ބަންޑުން ޖަހާލި އުފުލީގައި ތިބި މީހުން ސަލާމަތްކުރުމުގައި އެހީތެރިވީ ޖަޕާނު ކޯސްޓްގާޑުންނެވެ.