ރަސްދޫ ބަނދަރުގެ މައްސަލަ

މަޝްރޫއަށް ހުރަސް އަޅާފައިވާތީ ރާވާފައިވާ ތާވަލަށް މަސައްކަތް ކުރިއަށް ނުދާނެކަމަށް ކޮންސްޓްރެކްޝަން މިނިސްޓްރީން ބުނެފި

އަރިއަތޮޅު އުތުރުބުރީ ރަސްދޫގެ ކޮމެޓީތަކާއެކު ކުރަންޖެހޭ މަޝްވަރާތައް ފުރިހަމަ ނުވުމުން ރަސްދޫގެ ބަނދަރު ހެދުމުގެ މަޝްރޫއު ލަސްވެ މަސައްކަތް ކުރީގައި ރާވާފައިވާ ތާވަލަށް ކުރިއަށް ނުދާނެކަމަށް ބުދަދުވަހު މެންދުރުފަހު ކޮންސްޓްރަކްޝަން މިނިސްޓްރީން ނެރުއްވި ނޫސްބަޔާނެއްގައި ހާމަކުރައްވައިފިއެވެ.

ކޮންސްޓރަކްޝަން މިނިސްޓްރީން މިނޫސް ބަޔާން ނެރުއްވާފައިވަނީ ރަސްދޫގެ ބަނދަރާ ބެހޭގޮތުން އެރަށުގެ ކޮމެޓީތަކަށް މަލޫމާތު ދެއްވުމަށް އަންގާރަދުވަހު އެމިނިސްޓްރީން ފޮނުއްވެވި ޓީމް ހިފަހެއްޓުމާ ގުޅިގެންނެވެ. ކޮނސްޓްރަކްޝަން މިނިސްޓްރީން ރަސްދޫއަށް ފޮނުވި ޓީމުގައި ހިމެނެނީ އެމިނިސްޓްރީގެ 2 ޓެކްނިކަލް މުވައްޒަފުންނާއި، އަމީން ކޮނސްޓްރަކްޝަންގެ ފަރާތުން ވަޑައިގެންނެވި އިންޖިނިއަރިން ކޮންސަލްޓެންޓެކެވެ. މިޓީމާއއެކު އެއަތޮޅު އަތޮޅުވެރިޔާއާއި އެރަށު ކަތީބުވެސް ރައްޔިތުން ހިފެހެއްޓިއެވެ.

މިއަދު ކޮންސްޓްރަކްޝަން މިނިސްޓްރީން ނެރުއްވި ނޫސްބަޔާނުގައި އެމިނިސްޓްރީގެ ޓީމް ރަސްދޫރައްޔިތުން ހިފަހައްޓުމަކީ ގައިރުގާނޫނީ އަމަލެއްކަމަށާއި، އަދި އެޓީމުގެ މެމްބަރުންނަށާއި އެމެންބަރުންގެ އާއިލާތަކަށް ނަފްސާނީ ގޮތުން ނުތަނަވަސްކަން ލިބޭގޮތަށް ރަސްދޫގެ ބައެއް ރައްޔިތުން އަމަލުކޮށްފައިވާކަމަށްބުނެ އެކަން ވަނީ ކުއްވެރިކޮށްފައެވެ.

މިނިސްޓްރީން ނެރުއްވި ނޫސް ބަޔާނުގައި ހާމަކުރައްވާ ގޮތުގައި 24 އޮކްޓޯބަރ 2007ގައި އަމީން ކޮންސްޓްރަކްޝަންނާއެކު އެމިނިސްޓްރީން ކޮންޓްރެކްޓްގައި ސޮއިކޮށްފައިވަނީ 750 ފޫޓު، 250 ފޫޓުގެ ބަނދަރެއް ރަސްދޫގައި ހެދުމަށެވެ. އަދި އިއްޔެ ރަސްދޫއަށް މިނިސްޓްރީން ފޮނުވި ޓީމަކީ މަސައްކަތް ކުރަން ހަމަޖެހިފައިވާ ގޮތް ކޮމެޓީތަކަށް ސާފުކޮށްދިނުމަށް ފޮނުވި ޓީމެއް ކަމަށާއި، އެޓީމަކީ ރަސްދޫގެ ކޮމެޓީތަކާ ރަސްމީ ވާހަކަދެއްކުންތަކެއް ބާއްވަން ފޮނުވި ޓީމެއް ނޫންކަމަށްވެސް އެބަޔާނުގައި ވެއެވެ.

ރަސްދޫގެ ބަނދަރުގެ މައްސަލާގައި ރޭ ހިނގާދިޔަ ކަންތައްތަކާއި ގުޅޭގޮތުން މިނިވަނަށް މައުލޫމާތު ދެމުން ރަސްދޫގެ ރކ ކޮމެޓީގެ މެމްބަރަކު ބުނީ އެރަށު ރައްޔިތުންގެ އެދުމާ ހިލާފަށް ރަސްދޫގައި ބަނދަރު ހެދުމަށް ސަރުކާރުން ނިންމުމާ ގުޅިގެން އެރަށުގެ ގިނަ ރައްޔިތުންތަކެއް އޮފީސް ދޮށަށް އެއްވެ ހިންގި ހަރަކާތް އިއްޔެ ހަވީރު 5 ޖަހާކަންހާއިރު ހުއްޓާލާފައި ވާކަމަށެވެ. އެހެންނަމަވެސް އިއްޔެ އިރުއޮއްސީ 6:30 އެހާ ކަންހާއިރު މޯލްޑިވްސް ޕޮލިސް ސާވިސްގެ ޓީމެއް އެރަށަށް ދިޔަކަމަށާއި، ރޭ އެރަށަށް ދިޔަ ފުލުހުންގެ ޓީމުގައި ގާތްގަނޑަކަށް 60 އަށް ވުރެ ގިނަ ފުލުހުން ހިމެނޭ ކަމަށެވެ. އަދި ފުލުހުން ރަސްދޫއަށް އަރައި އަމަލުކުރަމުން ގެންދިޔައީ އެރަށުގެ އަމަން އަމާންކަން ގެއްލިދާފަދަ ގޮތަކަށްކަމަށްވެސް އެނާ ބުންޏެވެ.

"އަޅުގަނޑުމެން ދެކޭގޮތުގަ އެބޭފުޅުން އުޅުއްވީ މިރަށުގެ އަމަން އަމާންކަން ނަގާލަން. އެބޭފުޅުން އެކިތަންތަނަށް އެއްވެ ބޮޑެތި ޔުނީފޯމް ލައިގެން އެހާ ބައިވަރު ބަޔަކު މަގުތައްމަޗަށް އެއްވެ އެހެން އުޅުމުން މިރަށުގެ ކުޑަކުދިންނަށް ވަނީ ވަރަށް ބިރުގެންފަ. އަދި އެބޭފުޅުން ރކ ކޮމެޓީގެ މެމްބަރުން ގާތު ބުނި ޕޮލިސް ސްޓޭޝަނަށް އަންނާށޭ ބައްދަލުކޮށްލަން. ދެން އަޅުގަނޑުމެން ބުނިން އެގޮތަކަށް ރކ ކޮމެޓީގެ ބޭފުޅުން ގެންގޮސްގެން ވަކިވަކިން ބައްދަލެއް ނުކުރެވޭނެއޭ. ބައްދަލު ކުރަންޏާ ރކ ކޮމެޓީއާ ރައްޔިތުންނާ އެއްކޮންނޭ ބައްދަލުކުރެވޭނީ. ޕޮލިސް ސްޓޭޝަނަކަށް ނުދެވޭނެއޭ. އެއީ ބައްދަލުވުން ބާއްވާ ތަނެއް ނޫނޭ. އަޅުގަނޑުމެން ބުނިން ބައްދަލުވުން ބާއްވާނެ ހޯލެއް ހޯދަދޭނަމޭ. އެބޭފުޅުންވެސް ބުނި ތިކަމާ އެއް ބަހޭ. އެހެން ކިޔާފަ އަޅުގަނޑުމެން ހޯލް ތައްޔާރުކޮށްފަ ދިޔައީމަ ބުނީ އެބޭފުޅުންގެ ބޮޑުމީހާ ބުންޏޭ އިހަށް މަޑުކޮށްލާށޭ އެހެން ކިޔާފަ. އެހެން ކިޔާފަ ތިބެ 10 ވަރަކަށް މިނެޓް ފަހުން ރކ ކޮމެޓީގެ މެމްބަރަކު ގޮވައިގެން ދާންވެގެން އުޅުނީ. އެކަމަކު ރައްޔިތުން އެތަނަށް އެއްވެ ބުނީ ވަކި މީހަކު ނުގެން ދެވޭނެއޭ. ގެންދަންޏާ ހުރިހާ ރައްޔިތުން ގެންދާށޭ" ރަސްދޫ ރކ ކޮމެޓީގެ މެމްބަރަކު ކިޔައިދިނެވެ.

މިނިވަނަށް މައުލޫމާދު ދިން ފަރާތުން ބުނީ ފުލުހުން ރަސްދޫއަށް ގޮސް ފުލުހުންގެ އިމާރާތުންނާއި އެހެނިހެން ސަރުކާރުގެ ތަންތަކަށް ކަރަންޓް ދިނުމަށް މަޖުބޫރު ކޮށްފައިވާކަމަށާއި، އެހެން ނަމަވެސް އެރަށުގައި ހުރީ ރައްޔިތުންގެ ކަރަންޓަށް ވުމުން ސަރުކާރުން ބޭނުންވާހަ ވަގުތަކު އެކަރަންޓް ދެވެން ނޯންނާނެކަމަށް ކަތީބު ބުނިކަމަށްވެސް އެފަރާތުން މައުލޫމާތު ދިނެވެ.