މިހާތަނަށް ސަރުކާރުން މަސްވެރިންނަށް ކޮށްދީފައިވާ އެންމެ ރަގަޅުކަމަކީ ތެޔޮ އަގުހެޔޮކޮށް ލިބޭގޮތް ހަދައިދިނުން ކަމަށްވާއިރު، އެ އަގުހެޔޮ ތެޔޮ ހޯދުމަށް އާންމުކޮށް ހުޅުދެލީ މަސްވެރިން ފީފާއަކަށް ޚަރަދުކުރާ ފައިސާގެ ދެގުނަ ޚަރަދުކުރަން ޖެހޭކަމަށް އެމީހުން ބުނެފިއެވެ.
"ދެހާސް ރުފިޔާއަށް ދެ ހާސް ފައްސަތޭކައަށް ހުރި ތެޔޮ ފީފާއެއް އަހަރުމެންނަށް 4600 އަށް ލިބޭގޮތް ހަދައިދިނީމާ އެއީ ދެން މިހާތަނަށް މަސްވެރިއެއްގެ ހައިސިއްޔަތުން އެންމެ ހިތްހަމަޖެހުނު ކަމަކީ." ހުޅުދެލީގައި މަސްވެރިކަން ކުރަމުންދާތާ 22 އަހަރުވެފައިވާ ހުޅުދެލީ މުހަންމަދު ރަޝާދު ކިޔައިދެއްވިއެވެ. "ސަތޭކަޕަސަންޓް ކަންނެލީގެ މަސްވެރިކަން ކުރާ ދޯނިފަހަރު މިރަށުގައި މިއުޅެނީ... އެހެންނާ ކުރީގަ ވެއްޖިއްޔާ އަގުބޮޑު ތެޔޮ އަހަރުމެންނަށް މިޖެހެނީ 2300 ރުފިޔާ (ފީފާއަކަށް). އަގުހެޔޮ ތެޔޮ އަހަރުމެންނަށް އެބަޖެހޭ 4600... އެއީ ސަރުކާރުން މަސްވެރިންނަށް ވިއްކާ އަގުހެޔޮ ތެޔޮ... އެ ވާގޮތަކީ އަހަރުމެން އެބަޖެހޭ 180 ލީޓަރު ތެޔޮ އަޅަން މާލެދާން. އަގުހެޔޮ ތެޔޮ ބަލާ."
މުހަންމަދު މައުލޫމާތު ދިން ގޮތުގައި ސަރުކާރުން ދޯނިފަހަރަށް ތެޔޮ ދޫކުރަނީ ދޯނިފަހަރުގައި އަޅާފައި ހުންނަ އިންޖީނަށް ބަލާފައި ނޫން ކަމަށާއި ދޯނީގެ ދިގުމިނަށް ބަލާފައެވެ. ތެޔޮ ފީފާއެއްގައި 200 ލީޓަރު ހުންނައިރު ހުޅުދެލީގައި ބޮޑުކަންނެލީގެ މަސްވެރިކަން ކުރާ ދޯނިފަހަރަށް ދޫކުރަނީ ދުވާލަކަށް 180 ލީޓަރެވެ. އަދި މާލެ ދިޔުމަށް 1 ފީފާ ތެޔޮ އެމީހުން އަންދަންޖެހެއެވެ.
އޭނާ ބުނިގޮތުގައި ހުޅުދެލީގެ މަސްވެރިންނަށް މަސްވެރިކަން ކުރުމަށް އެވްރެޖްކޮށް ދުވާލަކު ދޮޅު ފީފާ ތެޔޮ ބޭނުންވެއެވެ.
"އެތެޔޮ ދޫކުރަނީ މަސްވެރިންނަށް ކަމަކު އަޅުގަޑުމެން ގަބޫލުކުރަނީ އެއީ އައްޑޫ މަސްވެރިންނަށް ކެންޕެއިންނަށް ދޫކުރާ އެއްޗެއްކަމަށް އަޅުގަޑުމެން ދެކެނީ." ރަޝާދާއި އޭނާގެ އެކުވެރިން ބުންޏެވެ. "އެމީހުންނަށް ލިބޭނެ މިފްކޯ ބޯޓު ފަހަރުން."
ސަރުކާރުން ދޫކުރާ އަގުހެޔޮ ތެޔޮ ހޯދުމަށް ދ އަތޮޅުގެ މަސްވެރިން ދާންޖެހެނީ މާލެއަށެވެ.
ސަރުކާރުން މަސްވެރިންނަށް އަގުހެޔޮކޮށް ތެޔޮ ދޫކުރަން ފެށިތާ މިހާރު 7 ދުވަސް ވެއްޖެއެވެ. ދައުލަތުގެ ބަޖެޓުގައި މިއަހަރު މަސްވެރިންނަށް ސަބްސިޑީޒްގެ ގޮތުގައި 1 ބިލިއަން ރުފިޔާ ހިމަނާފައިވެއެވެ.
No comments:
Post a Comment