ޑީއާރުޕީގެ ދައުވަތަކަށް ރާއްޖެވަޑައިގެން އުޅުންވާ ޗައިނާގައި ޚުދުމުހުތާރު ވެރިކަންކުރާ ކޮމިއުނިސްޓް ޕާޓީއާއި ޑީއާރުޕީއާ ގުޅުން ބަދިހިފައި އޮންނަނީ ދެފަރާތުގެވެސް އުސޫލުތައް އެއްގޮތްވުމުންކަމަށް އެމްޑީޕީގެ ވަގުތީ ޗެއަރޕާސަން މުހަންމަދު ލަތީފް ވިދާޅުވެއްޖެއެވެ.
ލަތީފް ވިދާޅުވީ ޗައިނާގެ ކޮމިއުނިސްޓް ޕާޓީގެ ވަފުދެއް ޑީއާރުޕީގެ ދައުވަތަކަށް ރާއްޖެއައުމަކީ އެމްޑީޕީން ކަންބޮޑުވުންފާޅުކޮށް ހަދާކަމެއްނޫންކަމަށާއި ނަމަވެސް އަމިއްލަ ހައިސިއްޔަތުން ދެކިލައްވާ ގޮތުގައި އެފަދަ ހުދުމުހުތާރު އަނިޔާވެރި ޕާޓީއަކާއި ޑީއާރުޕީ ގުޅެނީ ދެފަރާތުގެވެސް އުސޫލުތައް އެއްގޮތްވީމާ ކަމަށެވެ.
"އަޅުގަނޑުމެން ޕާޓީއަކުން މިކަމަކީ މާބޮޑުކަމެއްކަމަކަށް ނުދެކެން، އަޅުގަނޑުން ވެސް ތާއީދުކުރަނީ އަޅުގަނޑުމެންނާ ގުޅޭ ޕާޓީތަކާއި، އަމިއްލަ ހައިސިއްޔަތުން ދަންނަވާނަމަ ޑީއާރުޕީ ޗައިނާގެ ކޮމިއުނިސްޓް ޕާޓީއާ ގުޅެނީ ދެފަރާތުގެ އުސޫލުތައްވެސް އެއްގޮތްވީމަ" ލަތީފް ވިދާޅުވިއެވެ.
ޑީއާރުޕީގެ ރަސްމީ ވެބްސައިޓުން ހާމަކުރާ ގޮތުގައ ރޭ އެ ޕާޓީގެ ދަޢުވަތަކަށް މާލެވަޑައިގަންނެވި ސިޕީސީގެ ވަފުދު ދެކުނު ޗައިނާގެ ޔުނާން ޕްރޮވިންސްގެ ކެޕިޓަލް ކުމިންގ އިން މިއޭޕްރީލް މަހުގެ 12 ވަނަ ދުވަހު ފުރާވަޑައިގެން އެ ބޭފުޅުންގެ ފުރަތަމަ މަންޒިލަކީ ވިއެޓްނާމެވެ. އަދި ވިއެޓްނާމްގެ ކޮމިޔުނިސްޓް ޕާޓީއާއި ބައްދަލުކުރެއްވުމަށް ސީ.ޕީ.ސީ ގެ އިސްވެރިންގެ 7 ބޭފުޅުން އެކުލެވޭ ވަފުދު މާލެވަޑައިގެންނެވީ ސިންގަޕޯރ އެއަރލައިންސްއިންކަމަށް އެ ފަރާތުން ހާމަކރެއެވެ. ހަމައެހެންމެ ޗައިނާގެ ވެރިކަން ކުރާ ޕާޓީ ( ސީ.ޕީ.ސީ ) ގެ ދަޢުވަތަކަށް ފާއިތުވި 2007 ވަނަ އަހަރުގެ ޖޫންމަހުގެ ފަހުކޮޅުގައި ދިވެހިރައްޔިތުންގެ ޕާޓީގެ އިސްވަފުދެއްވަނީ ޗައިނާއަށް ޒިޔާރަތްކުރައްވާފައެވެ. އެދަތުރުގައި ޑީއާރުޕީގެ ވަފުދުންވަނީ ޗައިނާގެ އިޤްތިޞާދީ ކެޕިޓަލްކަމުގައިވާ ޝަންހާއީ އަށާއި، ޗައިނާގެ ޤަދީމީ ރަށެއްކަމުގައިވާ ޒިޔާން އަށް އަދި ޗައިނާގެ ވެރިރަށް ބެއިޖިންގ އަށް ޒިޔާރަތްކުރައްވާފައެވެ. ޑީއާރުޕީގެ ކައުންސިލްގެ ބޭފުޅުންނާއި، ޕާލިމެންޓްރީ ގުރޫޕުގެ މެންބަރުންގެ އިތުރުން ޕާޓީގެ މީޑިއާގެބޭފުޅުން ހިމެނިވަޑައިގަންނަވާގޮތަށް މިދިޔައަހަރު ކުރެއްވި ދަތުރުފުޅުގެ އިސްބޭފުޅަކަށް ވަޑައިގެންނެވީ ޕާޓީގެ ޕާލިމެންޓްރީ ގުރޫޕުގެ ލީޑަރ އޮނަރަބަލް އަނީސާ އަޙްމަދުކަމަށް ވެސް ހާމަކޮށްފައިވެއެވެ.
ރޭ މާލެވަޑައިގެންނެވި ސީ.ޕީ.ސީގެ ޑެލިގޭޝަން އަށް މަރުޙަބާ ދެންނެވުމަށް މާލޭ ބައިނަލް އަޤްވާމީ ވައިގެ ބަނދަރަށް ވަޑައިގެން ތިއްބެވީ ޑީއާރުޕީގެ ނާއިބު ޒަޢީމް އަޙްމަދު ތަސްމީން ޢަލީއާއި ޕާޓީގެ ރެޖިސްޓަރާރ އަދި އިސްތަރުޖަމާން އިބުރާހީމް ޝާފިޢުގެ އިތުރުން ޕާޓީގެ ކައުންސިލްގެ ޒުވާނުންގެ ގޮފީގެ ނާއިބުރައީސް އަޙްމަދު މަޙްލޫފާއި، ޕާޓީގެ ޕޮލިސީ ކޯޑިނޭޓަރ ޙިންނާ ޚާލިދުކަމަށް ވެބްސައިޓްގައި ހާމަކޮށްފައިވެއެވެ.
ހަމައެހެންމެ ޗައިނާގެ ވެރިކަން ކުރާ ޕާޓީގެ ވަފުދުގެ ބޭފުޅުންނަށް ޕާޓީގެ ފަރާތުން މަރުޙަބާ ދެންނެވުމަށްޓަކައި ޚާއްޞަ އިޙްތިފާލުތަކެއް މިއަދު ކުރިއަށް ގެންދަވާނޭކަމަށް ޕާޓީގެ އިސްތަރުޖަމާނު އަލްފާޟިލް އިބުރާހީމް ޝާފިޢު ވިދާޅުވެފައިވާކަމަށާއި ދެދުވަހުގެ މުއްދަތަށް ރާއްޖޭގައި މަޑުކުރެއްވުމަށް ހަމަޖެހިފައިވާ މި ވަފުދުގެ ބޭފުޅުން ޕާޓީގެ ލީޑަރޝިޕްގެ އިސްބޭފުޅުންނާއި ބައްދަލުކުރެއްވުން ހަމަޖެހިފައިވަނީ 17 ވަނަ ދުވަހުގެ ވަގުތެއްގައެވެ. މާދަމާ މިވަފުދުގެ ބޭފުޅުން ޕާޓީގެ މައިއޮފީހަށް ޒިޔާރަތްކުރައްވާނެކަމަށް ވެސް އެފަރާތުން ހާމަކޮށްފައިވެއެވެ.
No comments:
Post a Comment