ދިވެހިރާއްޖޭގައި މިއަހަރު ބޭއްވޭ ރިޔާސީ އިންތިހާބުގައި ވާދަކުރައްވާ ކެނޑިޑޭޓުން ރައްޔިތުންގެ މަޖިލީހުގައި އެބޭފުޅުންގެ ސިޔާސަތު ހާމަކޮށްދެއްވާ، މެންބަރުންގެ ސުވާލުތަކަށް ޖާވާބުދާރީވެލައްވާ، އެ ޖަލްސާ ދިވެހި ރައްޔިތުންނަށް ވަގުތުން ދެއްކުމަށް ބާރުއަޅާ، ރައްޔިތުންގެ މަޖިލީހުގެ ޤަވައިދަށް ބައެއް އިތުރުކުރުމަށް މާލޭ މެންބަރު އިބްރާހިމް އިސްމާޢިލް ހުށަހަޅުއްވާފައިވާ މައްސަލަ އާއި ޏ އަތޮޅު މެންބަރު މުހަންމަދު އިބްރާހިމްދީދީ (މޮޑީ) ހުށަޅުއްވާފައިވާ ކޮމިޝަންސް އޮފް އިލެކްޝަންސް މަޤާމަށް އިސްކުރުމާއި ވަކިކުރުމުގެ ބިލު ބުދަދުވަހު މަޖިލީހުގެ ތަޅުމުން އެއްލާލައިފިއެވެ.
މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި އެންމެ ފުރަތަމަ ކުރިއަށް ދިޔައީ މާލޭ މެންބަރު އިބްރާހިމް އިސްމާޢީލް ހުށަހަޅުއްވާފައިވާ މައްސަލައެވެ. އެ މައްސަލައާމެދު އިބްރާ ދެއްކެވި ވާހަކަފުޅުގައި މި މައްސަލާގައި ވާހަކަފުޅު ދައްކަވަމުން އައްޑުއަތޮޅުގެ މެންބަރު އިބްރާހިމް ޝަރީފާއި ރައީސުލްޖުމްހޫރިއްޔާގެ މެންބަރު މުހަންމަދު ސަލީމްގެ ވާހަކަފުޅުގައި އެ މައްސަލައަކީ ޤާނޫނު އަސާސީ ލަސްކުރެއްވުމަށް ހުށަހަޅާފައިވާ މައްސަލައެއްކަމަށް އިޝާރާތްކުރައްވާ ވާހަކަފުޅު ދައްކަވާފައިވާތީ، އެކަމަށް އިބްރާ ރައްދު ދެއްވިއެވެ. އެ މައްސަލައަކީ ރައްޔިތުންގެ ހާއްސަ މަޖިލީހާއި އިސްލާހްކުރެވެމުންދާ ޤާނޫނު އަސާސީއާ ރައްޔިތުންގެ މަޖިލީހާއި އިސްލާހްކުރެވެމުންދާ ޤާނޫނު އަސާސީއާއި އެއްވެސް ގުޅުމެއްނެތް މައްސަލައެއްކަމަށް އިބްރާ ވިދާޅުވިއެވެ. މިއަހަރު ދިވެހި ރާއްޖޭގައި ޕާޓީތަކުގެ މެދުގައި އިންތިހާބެއް ބޭއްވޭނެކަމުގެ އުންމީދު ވަރަށް ކުޑަކަމަށާއި އެހެންކަމުން ގަވައިދަށް އެބައި އިތުރު ނުކުރެވިއްޖެނަމަ ރައްޔިތުންގެ ބަހެއްނެތި ރައީސުލްޖުމްހޫރިއްޔާގެ އަށް މެންބަރުން ބޭނުންކުރައްވައިގެން ރައީސްކަމަށް ހޮވިވަޑައިގަންނަވާނެކަމުގެ ބިރުހީވާކަމަށް އިބްރާގެ ވާހަކަފުޅުގައި އިޝާރާތްކުރެއްވިއެވެ.
މި މައްސަލައަށް ރިޔާސަތުން ވޯޓަށް އެއްސެވާއިއެކު ހާޒިރުވެ ވަޑައިގެން ތިއްބެވި 29 މެންބަރުންގެ ތެރެއިން 14 މެންބަރުން ފެނިވަޑައިގަންނަވާކަމަށް ވޯޓު ދެއްވިއެވެ. އަދި ފެނިވަޑައި ނުގަންނަވާކަމަށް 5 މެންބަރުން ވޯޓު ދެއްވިއިރު ވަކިއަތަކަށް ވޯޓު ނުދެއްވާ 10 މެންބަރުން ތިއްބެވިއެވެ. އެހެންކަމުން މާލޭ މެންބަރު އިބްރާހިމް އިސްމާޢީލް ހުށަހަޅުއްވާފައިވާ ބައި ރައްޔިތުން މަޖިލީހުގެ ގަވައިދަށް އިތުރުކުރުމަށް ފާހެއްނުވުވިއެވެ.
މިއަދު ކުރިއަށް ދިޔަ ކޮމިޝަންސް އޮފް އިލެކްޝަންސް މަޤާމަށް އިސްކުރުމާއި ވަކިކުރުމުގެ ބިލާ ބޭހޭ ގޮތުން ބައެއް މެންބަރުން ވިދާޅުވީ އަދުލު އިންސާފަކީ މިހިނދުން މިހިނދަށް ދިވެހި ރާއްޖެއަށް ބޭނުންވެފައިވާކަމެއްކަމަށާއި އެހެންކަމުން އެ ބިލަކީ ވަރަށް މުހިންމު ބިލެއްކަމަށެވެ. އަދި ޑީއާރުޕީގެ މަސްލަހަތު އޮންނަ ބައެއް މެންބަރުން ބިލާމެދު ވާހަކަފުޅު ދައްކަވަމުން ވިދާޅުވެފައިވަނީ އުއްތަމަފަނޑިޔާރުގެ ބިލަކީ މުހިންމު ބިލެއްކަމަށްވިއަސް މިހިނދަށް އެބިލު ފާސްކުރަން ފެނިވަޑައިނުގަންނަވާކަމަށެވެ. މި ބިލަށް ތާއީދު ކުރައްވާ ވާހަކަފުޅު ދައްކަވަމުން ރ އަތޮޅު މެންބަރު އަލީ ވަހީދު ވިދާޅުވީ ޑީއާރުޕީގެ އަޣްލަބިއްޔަތު މަޖިލީހުގައި އޮތް ހާދުވަހަކު އިސްލާހީ މަސައްކަތްތައް ކުރިއަށް ނުދާނެކަމަށާއި މި ބިލުވެސް ފޭލިވާނެކަމަށެވެ.
މި ބިލަށް ރިޔާސަތުން ވޯޓަށް އެއްސެވާއިއެކު ހާޒިރުވެ ވަޑައިގެން ތިއްބެވި 26 މެންބަރުންގެ ތެރެއިން 18 މެންބަރުން ފެނިވަޑައިގަންނަވާކަމަށް ވޯޓު ދެއްވިއެވެ. އަދި ފެނިވަޑައި ނުގަންނަވާކަމަށް އެއްވެސް މެންބަރަކު ވޯޓު ދެއްވާފައި ނުވާއިރު، ވަގިގޮތަކަށް ފެނިވަޑައި ނުގަންނަވާކަމަށް 7 މެންބަރުން ވޯޓު ދެއްވިއެވެ. އަދި އެއްވެސް ގޮތަކަށް ވޯޓުގައި ބައިވެރިވަޑައި ނުގަންނަވާ އިންނެވީ ހދ އަތޮޅު މެންބަރު އަހްމަދު އަބްދުﷲ އެވެ. އެހެންކަމުން މި ބިލު ފާހެއްނުވިއެވެ.
މިއަދުގެ މަޖިލީހުގައި ފުވައްމުލަކު މެންބަރު މުޙަންމަދު އިބްރާހީމް ދީދީ ހުށަހަޅުއްވާފައިވާ ކޮމިޝަންސް އޮފް އިލެކްޝަންގެ މަގާމަށް އިސްކުރުމާއި ވަކިކުރުމުގެ ބިލުގެ ދެވަނަ ކިޔުމުގެ ރިޕޯޓްކުރުމުގެ މަރުޙަލާވެސް ކުރިއަށް ގެންދަވިއެވެ. މިބިލަށް މިއަދުގެ ޖަލްސާގައި މާލޭ މެންބަރު އިބްރާހިމް އިސްމާއީލް ހުށަހަޅުއްވާ ލ އަތޮޅު މެންބަރު މޫސާ މަނިކު ތާއީދުކުރެއްވި އިޞްލާޙަށް ވޯޓަށް އެއްސެވުމާ ހަމައަށްގޮސްފައިވަނިކޮށް މަޖިލީހުގެ ޤާނޫނީ އަދަދު ގެއްލުމުގެ ސަބަބުން 11:58 ގައި ޖަލްސާ ހުއްޓާލީއެވެ.
ހުސްވަގުތުކޮޅުގެ ކުރިން 34 މެންބަރުން އަދި ހުސްވަގުތުކޮޅުގެ ފަހުން 28 މެންބަރުން ހާޒިރުވެވަޑައިގެންނެވި މިއަދުގެ ޖަލްސާގެ ރިޔާސަތު ބެލެހެއްޓެވީ ރައްޔިތުންގެ މަޖިލީހުގެ ރައީސް އަލްފާޟިލް އަޙްމަދު ޒާހިރެވެ.
No comments:
Post a Comment