ހދ. ނަވައިދޫ އޮފީހުގެ ސީނިއަރ ވޯކީޓޯކީ އޮޕަރޭޓަރެއްގެ މަގާމުގައި ހުއްޓައި އެއްވެސް ހަގީގީ ސަބަބެއްނެތި ވަޒީފާއިން ވަކިކޮށްފައިވާ ކަމަށް ބުނެ ވަޒީފާ ލިބިދިނުމަށް އެދި އެރަށު ނަރުގިސްވިލާ ސާމިޔާ އަލީ މަދަނީ ކޯޓުގައި ދައުވާކޮށްފިއެވެ.
ހދ ނައިވާދޫ އޮފީހާ ދެކޮޅަށް ޝާމިޔާ ހުށަހަޅާފައިވާ ދައުވާގައި ބުނަނީ ނައިވާދޫ އޮފީހުގެ ވަޒީފާގައި އުޅެމުންގޮސް ސީނިއަރ ވޯކީޓޯކީ އޮޕަރޭޓަރެއްގެ މަގާމުގައި ޖުމްލަ 13 އަހަރާއި 9 މަސް ދުވަސް ހޭދަކޮށްފައިވަނިކޮށް އޭނާ ވަޒީފާއިން ވަކިކޮށްފައިވަނީ ވެރިކަމަށް އައި ބަދަލެއްގެ ސަބަބުން އެމީހުންގެ އާއިލާއެއްގެ އޮތް ހަސަދަވެރިކަމުގެ ނުފޫޒު ބޭނުންކޮށް ނައިވާދޫ އޮފީހުން އޭނާ އާ ބެހޭގޮތުން ދޮގު މައުލޫމާތު ސަރުކާރުގެ ކަމާ ބެހޭ ފަރާތްތަކަށް ހުށަހަޅައިގެން ކަމަށެވެ.
ހދ ނައިވާދޫ އޮފީހުގެ ސީނިއަރ ވޯކީޓޯކީ އޮޕަރޭޓަރެއްގެ މަގާމުގައި ހުއްޓައި ޝާމިޔާ ވަޒީފާއިން ވަކިކޮށްފައިވަނީ 14 މެއި 2007 ގައެވެ.
"އަޅުގަނޑު ހދ ނައިވާދޫ އޮފީހުގެ ވަޒީފާ 13 އަހަރާއި 9 މަސް ވަންދެކަން އަދާކުރިއިރު އެއްވެސް އިންޒާރެއް ނަސޭހަތެއް ދީފައެއް ނުވޭ، އަދި މިހާރު ހދ ނައިވާދޫ އޮފީހުން އަޅުގަނޑަށް ދިންކަމަށް ލިޔުމެއްލިޔެ އަޅުގަނޑަށް އަޑު އިއްވިކަމަށާއި އަދި އަޅުގަނޑު ސޮއިނުކުރުމުން ދެހެކިން ލައްވާ ސޮއި ކުރިކަމަށް ބުނަމުން ދަނީ ކަނޑައެޅިގެން ދޮގެއް، އަޅުގަނޑު ލައްވާ މިފަދަ ލިޔުމެއްގައި ސޮއިކުރަން ނޫޅޭ ކަމަށާއި ނަސޭހަތެއްވެސް ނުދޭ ކަމަށް އަޅުގަނޑު މިހުރީ ހުވައިކުރަންވެސް ތައްޔާރަށް" ޝާމިޔާ މަދަނީ ކޯޓަށް ހުށަހެޅުއްވި ދައުވާގައި ބަޔާން ކޮށްފައިވެއެވެ.
މިދައުވާއަށް ޖަވާބްދާރީ ވުމުގެ ގޮތުން ދައުލަތުން މިއަދު ވިދާޅުވީ ޝާމިޔާ ވަޒީފާއިން ވަކިކޮށްފައިވަނީ ގަވައިދާ ހިލާފަށް ރަށުއޮފީހުގެ ސިއްރުތައް ހާމަކޮށްފައިވާތީ އާއި ވެރިންނާއި ރައްޔިތުންގެ މެދުގައި ނަފްރަތު އުފެއްދުމަށް ތަފާތު ވާހަކަތައް ދައްކާފައިވާތީ ކަމަށެވެ.
ދައުލަތުން ވިދާޅުވީ ސާމިޔާ ވަނީ ރަށު އިންޖީނުގޭ ދޮށަށް މީހުން އެއްކޮށް ކަރަންޓު ބިލު ބޮޑުވާ ވާހަކައާއި ރަށުއޮފީހުން ހިންގަމުންދާ ޕްރީ ސްކޫލު ހިންގަމުންދަނީ މާ ބޮޑު އަގެއްގައި ކަމާއި އެއަށްވުރެއް ކުޑަ އަގެއްގައި ޕްރީ ސްކޫލު ހިންގިދާނެ ކަމަށް ރައްޔިތުންގެ ކައިރީ ވާހަކަ ދައްކައި ހަމަނުޖެހުން އުފެއްދުމަށް މަސައްކަތްކޮށްފައި ކަމަށެވެ. އަދި އޭނާ ވަޒީފާއިން ވަކިކޮށްފައިވަނީ މިފަދަ އަމަލުތައް ނުކުރުމަށް ތިން ފަހަރު ނަސޭހަތާއި އިންޒާރު ދިނުމަށްފަހުގަ ކަމަށް ވިދާޅުވިއެވެ. އެގޮތުން ސާމިޔާއަށް ދީފައިވާ އިންޒާރުގެ ޗިޓުގައި އޭނާ ސޮއިކޮށްފައިނުވާ ކަމަށާއި ނަމަވެސް އިންޒާރުގެ ޗިޓުގައި ދެ ހެކީން ސޮއިކޮށްވާފައިވާ ކަމަށް ވިދާޅުވިއެވެ.
އެކަން ސާބިތު ކުރުމުގެ ގޮތުން ދައުލަތުންވަނީ ހެކީން ހުށަހަޅުއްވާފައެވެ. އެމީހުންނަކީ ނައިވާދޫ ވައްތިޔަރަގޭ އަބްދުއް ސަމަދާއި ތިޔަރަގޭ އަބްދުﷲ މުހައްމަދާއި ހުސްނުހީނާގޭ ހަދީޖާ ހަސަންއެވެ.
ޝާމިޔާގެ ފަރާތުން ވާހަކަ ދައްކަވާ ވަކީލު އަހުމަދު ނަޖީބް ވިދާޅުވީ ޝާމިޔާއަށް ވަޒީފާގެ ޕްރޮމޯޝަނެއް ލިބިފައިވާއިރު އެ ޕްރޮމޯޝަނުގެ ފަހުން އެއްވެސް އިންޒާރެއް ދެވިފައިނުވާ ކަމަށެވެ. އަދި ޝާމިޔާ ވަޒީފާއިން ވަކިކޮށްފައިވަނީ އޭރުގެ ކަތީބާއި މިހާރުގެ ކަތީބާ ދެމެދު އޮތް ދެކޮޅުވެރިކަމެއްގެ ސަބަބުން ކަމަށްވެފައި ސާމިޔާ ވަޒީފާއިން ވަކިކުރައްވާފައި އޮތް އޮތުމަކީ ޒާތީ ކަމެއް ކަމަށް ވިދާޅުވިއެވެ.
އޭނާ ވިދާޅުވީ ރަށުގެ އިންޖީނުގޭ ދޮށަށް ރައްޔިތުން އެއްކުރިކަމަށް ދައުލަތުން ވިދާޅުވާއިރު އެއެއްވުމާ ގުޅިގެން އެއްވެސް މީހެއްގެ މައްޗަށް ފިޔަވަޅެއް ސަރުކާރުން އަޅުއްވާފައިނުވާ ކަމަށެވެ. އަދި އެއެއްވުމަކީ ޣައިރުގާނޫނީ އެއްވުމަކަށްވާނަމަ، އެއެއްވުމުގައި ބައިވެރިވި މީހުންގެ މައްސަލަ ޝަރީއަތައް ފޮނުވަން ޖެހޭނެ ކަމަށާއި ނަމަވެސް އެކަންވެސް ދައުލަތުން ކުރައްވާފައިވާ ނުވާހިނދު މިމައްސަލާގައި ހަމައެކަނި ސާމިޔާގެ ކުއްވެރި ނުކުރެވޭނެ ކަމަށެވެ.
ހއ ހޯރަފުށީ ކޯޓުގެ ކާތިބާއަކަށް ހުރި އެރަށު އަސްރަފީގޭ ޒުނޭރާ މުހައްމަދު ސަރުކާރު މުވައްޒަފުންގެ ގަވައިދާ ހިލާފަށް ވަޒީފާއިން ވަކިކޮށްފައިވާ ކަމަށް ބުނެ ޖަސްޓިސް މިނިސްޓްރީއާ ދެކޮޅަށް ކުރާ ދައުވާގެ މައްސަލައެއްވެސް މަދަނީ ކޯޓުގައި ކުރިއަށް އެބަދެއެވެ. މިދައުވާ ހުށަހަޅުއްވާ ދެއްވަމުން މިމަހުގެ 2 ވަނަ ދުވަހު ޒުނޭރާ ވިދާޅުވީ 14 އޮކްޓޫބަރު 2002 ގައި އޭނާ ވަޒީފާއިން ވަކިކުރައްވާފައިވަނީ މިނިސްޓްރީ އޮފް ޖަސްޓިސްއަށް ލިބިވަޑައިގެންވާ ބާރުގެ ބޭނުން ނަހަމަ ގޮތުގައި ބޭނުން ކުރައްވައިގެން ކަމަށެވެ.
މީގެއިތުރުން ތ. އަތޮޅު ކަނޑޫދޫ އޮފީހުގައި 13 އަހަރުގެ މުއްދަތެއްގައި ވޯކީ ޓޯކީ އޮޕަރޭޓަރެއްގެ ވަޒީފާ އަދާކޮށްފައިވާ އެރަށު ފިނިފެންމާގޭ ހައްވާ އުމަރު ވަޒީފާއިން ވަކިކޮށްފައިވަނީ ގަވައިދާ ހިލާފަށް ކަމަށް ބުނެ އޭނާ މަދަނީ ކޯޓުގައި ކުރާ ދައުވާގެ ޝަރީއަތެއްވެސް ކުރިއަށް އެބަދެއެވެ.
No comments:
Post a Comment