ސިފައިންގެ ދުވަސް ފާހަގަކޮށްފި

އަބްދުއްރަހްމާން

 

ދިވެހި ސިފައިންގެ 116 ވަނަ އަހަރީދުވަސްކަމަށް ބުނެ އެދުވަހުގެ މުނާސަބަތުގައި ދިދަ ނެގުމުގެ ޚާއްޞަ ރަސްމިއްޔާތު ހޯމަދުވަހު ބަންޑާރަކޮށީގައި ބާއްވައިފިއެވެ. މިއަދު ހެދުނު 6:00 ގައި ބޭއްވުނު މިރަސްމިއްޔާތު ޝަރަފުވެރި ކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އަދި ސިފައިންގެ އެންމެ މަތީ ވެރިއާގެ ނާއިބް އޮނަރަބަލް އަލްފާޟިލް އިސްމާއިލް ޝަފީޢުއެވެ.

މިރަސްމިއްޔާތުގައި އެމް.އެން.ޑީ.އެފްގެ ޗީފް އޮފް ސްޓާފް މޭޖަރ ޖެނެރަލް މުޙައްމަދު ޒާހިރު އާއި ސިފައިންގެ އޮފިސަރުންގެ އިތުރުން އެހެނިހެން ރޭންކުތަކުގެ ސިފައިން ބައިވެރިވެލެއްވިއެވެ. މިރަސްމިއްޔާތުގައި ޝަރަފުވެރި މެހުމާން ސިފައިންގެ 116 ވަނަ އަހަރަށް ކަނޑައަޅުއްވާފައިވާ ޝިއާރު އިއުލާން ކޮށްދެއްވިއެވެ. ދިވެހި ސިފައިންގެ 116 ވަނަ އަހަރުގެ ޝިއާރަކީ "ސަފުތަކުގެ ބަދަހިކަމަކީ ކާމިޔާބުގެ ސިއްރު" އެވެ. މިރަސްމިއްޔާތުގައި ޝަރަފުވެރި މެހުމާން ދެއްކެވި ވާހަކަފުޅުގައި 2008 އޭޕްރީލް 2 ވަނަ ދުވަހު އޮތް ރައްޔިތުންގެ މަޖިލިހުގެ އިއްތިފާގުން ސިފައިންގެ ބިލް ފާސްވެގެން ދިޔުމަކީ ސިފައިންގެ މަސައްކަތަށް އިތުރު ކުރިއެރުންތައް ލިބިގެންދާނެކަމަށް ފާހަގަކުރެއްވިއެވެ. އަދި މީގެއިތުރުން ސިފައިންގެ ޤައުމީ ޚިދުމަތުގައި މަސްއޫލިއްޔަތާއި ވާޖިބު އަދާކުރުމުގައި ސަފުތަކުގެ ބަދަހިކަމަށް ގުޑުމެއް ނައިސް ދުވަހުން ދުވަހަށް ހަރުދަނާ ވެގެން ދިއުމަށް ދިވެހި ސިފައިންނަށް އެމަނިކުފާނު ގޮވާލެއްވިއެވެ. މިރަސްމިއްޔާތު ނިމިގެންދިޔައީ ޚާއްޞަ ދުއާ ދެންނެވުމަކުންނެވެ.

ދިވެހި ސިފައިންނަށް ކުއްލިއަކަށް 100 އަހަރުފުރުނީ 1992 ވަނަ އަހަރުއެވެ.