އަބްދުއްރަހްމާން
މަސްތުވާތަކެތީގެ ތަފާތު ދެމައްސަލައަކާ ގުޅިގެން 4 މީހަކު ފުލުހުން ހައްޔަރުކޮށްފިކަމަށް ފުލިހުން ބުނެއެވެ. މީގެ ތެރެއިން 3 މީހަކު ހައްޔަރުކޮށްފައިވަނީ މިމަހުގެ 11 ވަނަ ދުވަހުގެ ހަވީރުގެ ވަގުތެއްގައި ހުޅުމާލޭ ފްލެޓެއްގެ ތެރޭގައި ބަޔަކު މަސްތުވާތަކެތި ބޭނުންކުރަން އުޅޭކަމުގެ ރިޕޯރޓެއް ފުލުހުންނަށް ލިބުމާ ގުޅިގެން ފުލުހުން އެތަނަށް ގޮސް ބެލިބެލުމުން މިމީހުން ތިބި ކޮޓަރި ތެރެއިން މަސްތުވާ ތަކެތީގެ ބާވަތެއްކަމުގައި ބެލެވޭ ދިޔާއެއްޗެއް އަޅާފައި ހުރި ކުދި 3 ރަބަރު ޕަކެޓް ފެނިގެންނެވެ.
ފުލުހުން ބުނަނީ މިމީހުން ތިބި ކޮޓަރީގެ ފާޚާނާ ފުލުހުން ޗެކްކޮށް ބެލިބެލުމުން މަސްތުވާތަކެތި ބޭނުންކުރުމަށް ގެންގުޅޭ ބައެއް އާލާތްތައް ފެނިފައިވާކަމަށެވެ.
އަދި ހަތަރު ވަނަ މީހާ ފުލުހުންގެ ބެލުމުގެ ދަށަށް ގެނެސްފައިވަނީ އާދީއްތަދުވަހުގެ ވަގުތެއްގައި ހދ.ކުޅުދުއްފުށީގެ ގެއެއްގެ ކޮޓަރިއެއްގެ ތެރޭގައި މީހަކު މަސްތުވާތަކެތި ގެންގުޅޭ ކަމަށް ފުލުހުންނަށް ހުށަހެޅުނު ރިޕޯރޓަކާ ގުޅިގެންކަމަށް ފުލުހުން ބުނެއެވެ. ފުލުހުން އެގެއަށް ގޮސް ބެލިބެލުމުން މަސްތުވާތަކެތީގެ ބާވަތެއް ކަމުގައި ބެލެވޭ އެއްޗެއް އަޅާފައި ހުރި ކުދި ރަބަރު 3 ޕަކެޓް ފެނިފައިވާކަމަށް ވެއެވެ.
No comments:
Post a Comment